Քրդերը պատրաստ են հրադադարի և դեմոկրատական ճանապարհով խնդրի լուծմանը

Տարածաշրջան18:55, 15 Սեպտեմբեր 2015

Քրդերը պատրաստ են հրադադարի և դեմոկրատական ճանապարհով խնդրի լուծմանը

Հյուսիսային Իրաք մեկնած և Քանդիլում քրդական ղեկավարության հետ բանակցած պատվիրակությունն ավարտել է իր առաքելությունը և վերադարձել Թուրքիա:

Թուրքական «haberler» լրատվական կայքի հաղորդմամբ` 8 հոգանոց պատվիրակության կազմում ընդգրկված են եղել Թուրքիայի քրդամետ «Ժողովուրդների դեմոկրատական կուսակցության» (ԺԴԿ-HDP), համանախագահներից Ֆիգեն Յուքսեքդաղը, «Դեմոկրատական հասարակական կոնգրեսի» (DTK) համանախագահ և Թուրքիայի Հաքքարի նահագի պատգամավոր Սելմա Ըրմաքը, «Ժողովուրդների դեմոկրատական կոնգրեսի» (HDK) խոսնակ, և ԺԴԿ-ի Մերսինի պատգամավոր Էրթուղրուլ Քյուրքչուն, ինչպես նաև «Դեմոկրատական տարածաշրջանների կուսակցության» (DBP) համանախագահ Քամուրան Յուքսեքը:

Այցի ընթացքում պատվիրակությունը հանդիպումներ է ունեցել Իրաքի նախկին նախագահ և քուրդ քաղաքական գործիչ Ջելալ Թալաբանիի, «Քուրդիստանի հայրենասերների միությունը» (KYB), ինչպես նաև «Քրդական համայնքների միության» (KCK) ղեկավարների հետ:

Հանդիպումների ժամանակ կողմերը խոսել են Թուրքիայում տեղի ունեցող թուրք-քրդական բախումների, ինչպես նաև նոյեմբերի 1-ին Թուրքիայում կայանալիք խորհրդարանական ընտրությունների մասին:

Թուրքական աղբյուրը նաև նշում է, որ KCK-ի գործադիր խորհրդի անդամներից Մուրաթ Քարասուն «Med Nuçe TV» հեռուստալիքով, խոսելով Թուրքիայում տեղի ունեցող իրադարձությունների և հրադադարի մասին, նշել է, որ իրենք պատրաստ են թուրք-քրդական հաշտեցման դեմոկրատական գործընթացին:

Աղբյուր` Ermenihaber.am