«Քամփ Արմենում» հերթապահող երիտասարդների վրա կրկին հարձակվել են

Հասարակական11:01, 08 Սեպտեմբեր 2015

«Քամփ Արմենում» հերթապահող երիտասարդների վրա կրկին հարձակվել են

Երեկ գիշերը 01:30-ին անհայտ անձանց մի խումբ մահակներով հարձակվել է Ստամբուլի Թուզլա շրջանում գտնվող հայկական մանկատան ճամբարում հերթապահող հայ երիտասարդների վրա: «Ակօս» շաբաթաթերթը տեղեկացնում է, որ 6 հոգանոց խմբի և ճամբարի պահպանության համար հերթապահողների միջև ճամբարի մուտքի մոտ քաշքշուկ է սկսվել: Նրանք չեն կարողացել ճամբարի տարածք մտնել:

Սա «Քամփ Արմենի» վրա իրականացված 2-րդ հարձակումն էր, առաջինը եղել էր ճամբարի ապամոնտաժման դեմ պայքարող երիտասարդների հերթապահության 100-րդ օրը:

Հիշեցնենք, որ «Քամփ Արմեն» հայկական ճամբարը Ստամբուլի Թուզլա շրջանում գտնվող, երեկ լքված, այսօր արդեն կիսաքանդ մի շինություն է: Ներկայումս ավերակի վերածված շինությունը ժամանակին եղել է չքավոր ու որբ հայ երեխաների ամառային ճամբարը: 8.552 քմ տարածք ունեցող «ՔամփԱրմենը» 1961 թվականին գնվել է Հայ բողոքական եկեղեցու հիմնադրամի կողմից և ծառայել է որպես ամառային ճամբար` Գեդիկփաշայի հայկական դպրոցի չքավոր ու որբ սաների համար: Հայտնի է, որ այստեղ են մեծացել նաև 2007թ. Թուրքիայում սպանված հայտնի հայ լրագրող Հրանտ Դինքը և նրա կին Ռաքել Դինքը:

2015 մայիսի 6-ի առավոտյան ճամբարի ներկայիս սեփականատիրոջ նախաձեռնությամբ սկսվել էր ճամբար-մանկատան ապամոնտաժումը, սակայն կարճ ժամանակ անց Թուրքիայի հայկական համայնքի սկսած բողոքի լայնածավալ միջոցառումների շնորհիվ շինության ապամոնտաժումը ժամանակավորապես դադարեցվել էր:

Աղբյուր` Ermenihaber.am