Թուրքիայում ժամանակավոր կառավարությունը կարող է ձևավորվել առանց քրդամետ կուսակցության

Տարածաշրջան10:13, 24 Օգոստոս 2015

Թուրքիայում ժամանակավոր կառավարությունը կարող է ձևավորվել առանց քրդամետ կուսակցության

Թուրքիայում ժամանակավոր կառավարությունը կարող է կազմավորվել` առանց քրդամետ «Ժողովուրդների դեմոկրատական կուսակցության» մասնակցության: Այս մասին տեղեկացնում է թուրքական « t24» լրատվական կայքը:

Չնայած ԺԴԿ-ն համաձայնություն էր տվել մասնակցել ժամանակավոր կառավարության ձևավորմանը, որտեղ ստանալու է 3 նախարարական պորտֆեյլ, սակայն խնդիրներ են ծագել նախարարների անունների շուրջ, քանի որ քրդամետ կուսակցությունն ինքն է ցանկանում առաջադրել իր նախարարներին:

Աղբյուրը նշում է, որ Սահմանադրության 114-րդ հոդվածի համաձայն, վարչապետի կողմից կուսակցություններին առաջարկված նախարարների թեկնածությունները հավանության չարժանանալու կամ էլ կուսակցությունների կողմից իրենց անդամներին հետ կանչելու դեպքում, նախարար կնշանակվեն անկախ քաղաքական գործիչներ (մեջլիսի պատգամավորներ և պատգամավոր չհանդիսացողներ):

Հետևաբար, եթե Թուրքիայի վարչապետ Ահմեթ Դավութօղլուի առաջարկած ԺԴԿ-ի 3 պատգամավորները կուսակցության կողմից չհաստատվեն, կամ էլ ընտրված նախարարությունները հավանության չարժանանան, ապա դրանք կփոխանցվեն անկախ գործիչների:

Թուրքիայում հունիսի 7-ին տեղի էին ունեցել խորհրդարանական ընտրություններ, որի արդյունքում որևէ կուսակցություն միանձնյա կառավարություն կազմելու իրավունք չստացավ: Թուրքիայի սահմանադրությամբ հաստատված 45-օրյա ժամկետում կոալիցիոն կառավարություն կազմելու փորձերը ձախողվեցին, ինչի արդյունքում անցկացվելու են վաղաժամ ընտրություններ:

Ժամանակավոր կառավարությունը, որը պետք է գործի մինչև վաղաժամ ընտրությունների անցկացումը, պետք է կազմված լիներ խորհրդարան անցած 4 քաղաքական կուսակցությունների («Արդարություն և զարգացում կուսակցություն» (ԱԶԿ-AKP), «Ժողովրդահանրապետական կուսակցություն» (ԺՀԿ-CHP), «Ազգայնական շարժում կուսակցություն» (ԱՇԿ-MHP), «Ժողովուրդների դեմոկրատական կուսակցություն» (ԺԴԿ-HDP) ներկայացուցիչներից: Սակայն «ԱՇԿ»-ն և «ԺՀԿ»-ն հրաժարվել են մաս կազմել ժամանակավոր կառավարությանը: Այս պարագայում ընտրությունների արդյունքներով «ԺՀԿ»-ին և «ԱՇԿ»-ին բաժին ընկնող համապատասխանաբար 6 և 3 նախարարական մանդատները պետք է ստանձնեն 9 անկախ քաղաքական գործիչներ:

Աղբյուր` Ermenihaber.am