Թուրքական սոցիոլոգիական ընկերություն. «Հնարավոր է` երկրում չանցկացվեն արտահերթ ընտրություններ»

Տարածաշրջան10:09, 22 Օգոստոս 2015

Թուրքական սոցիոլոգիական ընկերություն. «Հնարավոր է` երկրում չանցկացվեն արտահերթ ընտրություններ»

Թուրքական «Metropoll» սոցիոլոգիական ընկերության նախագահ Օզեր Սենջարը համացանցում որոշ մանրամասներ է հրապարակել Թուրքիայում արտահերթ ընտրությունների թեմայով օգոստոս ամսին ընկերության կատարած սոցհարցումների արդյունքների վերաբերյալ:

Ըստ թուրքական «Cumhuriyet» թերթի կայքի` հարցման արդյունքները ցույց են տվել, որ հունիսի 7-ին Թուրքիայում տեղի ունեցած խորհրդարանական ընտրություններից հետո իր ձայները ավելացրած միակ կուսակցությունը քրդական «Ժողովուրդների դեմոկրատական կուսակցությունն» (HDP-ԺԴԿ): Հարցումն իրականացրած սոցիոլոգիական ընկերության ղեկավարը նշել է, որ հնարավոր է` ԺԴԿ-ն դառնա Թուրքիայի 3-րդ կուսակցությունը` առաջ անցնելով «Ազգայնական շարժում կուսակցությունից» (MHP-ԱՇԿ):

Հարցման արդյունքները ցույց են տվել նաև, որ իշխանական «Արդարություն և զարգացում» (AKP-ԱԶԿ), գլխավոր ընդդիմադիր «Ժողովրդահանրապետական» (CHP-ԺՀԿ) և ընդիմադիր «Ազգայնական շարժում» (MHP-ԱՇԿ) կուսակցությունների ձայների զգալի փոփոխություն չեն արձանագրել:

«ԱԶԿ-ն հնարավորություն չի ունենալու միայնակ կառավարություն կազմել: Այս պարագայում հավանական է, որ Թուրքիայում արտահերթ ընտրություններ չանցկացվեն»,- նշել է սոցիոլոգիական ընկերության նախագահը:

Աղբյուր` Ermenihaber.am