ERMENI HABER AJANSI

Թուրքիայի բնակչությունը 2002թ. կազմում էր 65 մլն, իսկ 2014թ.՝ արդեն հասել էր 78 միլիոնի: Այսպիսով, 12 տարում երկրի բնակչությունը աճել է 20 տոկոսով:  Հետազոտական տվյալների համաձայն՝ այդ ընթացքում Թուրքիայում 33 տոկոսով աճել է նաև ինքնասպանությունների թիվը:

Թուրքական «haber.sol.org» լրատվակայքը ներկայացնում է 2002-2014թթ. Թուրքիայում տեղի ունեցած ինքնասպանության դեպքերի վերաբերյալ Ֆաթիհ համալսարանի մասնագիտացված խմբի վերլուծությունը:

Ըստ աղբյուրի՝ Թուրքիան աշխարհում 77-րդ տեղն է զբաղեցնում՝ ըստ բնակչության թվի ինքնասպանությունների քանակի առումով:

2002-2014թթ. ընթացքում Թուրքիայում ավելի քան 30.000 մարդ է դիմել ինքնասպանության: Մասնավորապես 2002թ.-ին գրանցվել է 2301, իսկ արդեն 2014թ.՝  3301 ինքասպանության դեպք: Դա նշանակում է, որ միջին հաշվով Թուրքիայում ամեն օր 9 մարդ է ինքնասպանություն գործում:

2014թ. ընթացքում Թուրքիայի տարածքում ամենաշատ ինքնասպանություններ են տեղի ունեցել Թունջելիում, Բինգյոլում, Էդիրնեում, Սինոպում և Քըրշեհիրում:  Իսկ նույն տարվա ընթացքում ամենաքիչ ինքնասպանությունները նկատվել են Բարթըն, Չանքըրը, Բայբուրթ, Աքսարայ և Յալովա շրջաններում:

Ընդ որում, ըստ վիճակագրության, Թուրքիայում տղամարդիկ 3 անգամ ավելի շատ են ինքնասպանություն գործում, քան՝ կանայք: