ԱԶԿ-ի կուլիսներում ժամանակավոր կառավարության կազմելու վերաբերյալ բուռն քննարկումներ են

Քաղաքական13:57, 20 Օգոստոս 2015

ԱԶԿ-ի կուլիսներում ժամանակավոր կառավարության կազմելու վերաբերյալ բուռն քննարկումներ են

Թուրքիայի վարչապետ Ահմեթ Դավութօղլուի կողմից երկրում կոալիցիոն կառավարություն կազմելու փորձերը անհաջողությամբ ավարտվելուց հետո նախագահ Ռեջեփ Թայիփ Էրդողանը ժամանակավոր կառավարություն կազմելու որոշում է կայացրել:

Ըստ թուրքական «Cumhuriyet» թերթի կայքի` ժամանակավոր կառավարությունը, որը պետք է գործի մինչև վաղաժամ ընտրությունների անցկացումը, պետք է կազմված լիներ խորհրդարան անցած 4 քաղաքական կուսակցությունների («Արդարություն և զարգացում կուսակցություն» (ԱԶԿ-AKP), «Ժողովրդահանրապետական կուսակցություն» (ԺՀԿ-CHP), «Ազգայնական շարժում կուսակցություն» (ԱՇԿ-MHP), «Ժողովուրդների դեմոկրատական կուսակցություն» (ԺԴԿ-HDP) ներկայացուցիչներից: Սակայն «ԱՇԿ»-ն և «ԺՀԿ»-ն հրաժարվել են մաս կազմել ժամանակավոր կառավարությունում: Այս պարագայում ընտրությունների արդյունքներով «ԺՀԿ»-ին և «ԱՇԿ»-ին բաժին ընկնող համապատասխանաբար 6 և 3 նախարարական մանդատները պետք է ստանձնեն 9 անկախ քաղաքական գործիչներ:

Ըստ աղբյուրի` ԱԶԿ-ի կուլիսներում տարբերակներ են քննարկվում անկախ քաղաքական գործիչներին (մեջլիսի պատգամավոր չհանդիսացող) տրվելիք նախարարական պորտֆելներ ևս ԱԶԿ-ականներով լրացնելու հնարավորության վերաբերյալ:

Ըստ այդմ տարբերակներից մեկը նախատեսում է 9 անկախ նախարարական պորտֆելների «հարցը լուծել» ԱԶԿ-ական այն գործիչներով, որոնք կուսակցություն ներքին կանոնադրությամբ գործող 3 գումարումից ավել անընդմեջ ընտրվելու արգելքի վերացումից հետո էլ չեն ներառվի ԱԶԿ-ի ցուցակներում: Սակայն այս դեպքում էլ առաջ է գալիս այն մտավախությունը, որ բոլոր 9 անկախ պորտֆելները հնարավոր չի լինի տալ ԱԶԿ-ին: Այս իրավիճակի համար էլ քննարկվում է պորտֆելների մի մասը հանձնել ԱԶԿ-ի նախընտրական ցուցակներում չընդգրկված այն ԱԶԿ-ականներին, որոնք նախկինում 3 անգամ անընդմեջ անցել են խորհրդարան, իսկ մի մասն էլ կհանձնվի գիտական ու հասարակական շրջանակների ներկայացուցիչների:

Աղբյուր` Ermenihaber.am