ERMENI HABER AJANSI

Հանրային կարծիքի ուսումնասիրությամբ զբաղվող «ANDY-AR»  ընկերությունը հրապարակել է Թուրքիայում խորհրդարանական արտահերթ ընտրությունների անցկացման դեպքում քաղաքական կուսակցությունների ստանալիք ձայների  հավանական պատկերը: Ըստ այդմ՝ արտահերթ ընտրությունների անցկացման դեպքում որևէ լուրջ փոփոխություն թուրքական կուսակցությունների հետևորդների թվում չի սպասվում, քան կար հունիսի 7-ին կայացած ընտրությունների ժամանակ:

Ըստ թուրքական «Cumhuriyet» պարբերականի կայքի՝ ընտրողների շրջանում նշյալ ընկերության անցկացրած հարցումներից պարզվել է, որ եթե հիմա լինեն արտահերթ ընտրություններ, իշխող «Արդարություն և զարգացում»  կուսակցությունը (ԱԶԿ- AKP) կստանա 42.8 տոկոս ձայն,  գլխավոր ընդդիմադիր ուժ համարվող  ձախակողմյան քեմալիստական «Ժողովրդահանրապետական կուսակցությունը» (ԺՀԿ-CHP)՝ 27 տոկոս ձայն, ընդդիմադիր «Ազգայնական շարժում» կուսակցությանը (ԱՇԿ -MHP)՝ 15.9 տոկոս ձայն: Հարցման ենթարկվածների 12.8 տոկոսն էլ նշել է, որ արտահերթ ընտրությունների դեպքում իր ձայնը կտա քրդամետ ընդդիմադիր «Ժողովուրդների դեմոկրատական կուսակցությանը» (ԺԴԿ –HDP):

Ընդ որում հարցվողների միայն 1.5 տոկոսն է ընդգծել, որ հունիսի 7-ի խորհրդարանական ընտրություններում  իր ձայնը տվել է այլ կուսակցության: Ըստ հարցման արդյունքների՝ վերջին երկու ամսում AKP-ին և CHP-ին նախապատվություն տվողների թիվը 2 տոկոսով աճել է:

Իսկ այն հարցին, թե երկու հնարավոր տարբերակներից որն են նախընտրում՝ արտահերթ ընտրությունները, թե կոալիցիայի ձևավորումը, արտահերթ ընտրություններին նախապատվություն է տվել AKP-ին նախընտրող ընտրազանգվածի 78.3 տոկոսը, MHP-ի հետևորդների 45.4 տոկոսը, HDP-ականների 24 տոկոսը և CHP ականների 20.1 տոկոսը:

Իսկ CHP–ի ընտրազանգվածի 75.2 տոկոսը հայտարարել է, որ ցանկալի է քաղաքական կուսակցությունների միջև կոալիցիայի ձևավորվի: HDP-ի հետևորդների 74.7,  MHP-ի 42.1 և AKP-ի 17 տոկոսը ևս նախապատվությունը տվել է կոալիցիայի ձևավորմանը: