Կոալիցիոն կառավարություն կազմելուց բացի Թուրքիայում քննարկվում է մեկ այլ սցենար

Քաղաքական08:33, 06 Օգոստոս 2015

Կոալիցիոն կառավարություն կազմելուց բացի Թուրքիայում քննարկվում է մեկ այլ սցենար

Թուրքիայի վարչապետ Ահմեթ Դավութօղլուի ղեկավարած իշխանական «Արդարություն և զարգացում» կուսակացությունում (ԱԶԿ-AKP) կառավարություն կազմելու 3 հիմնական այլընտրանքային տարբերակներից բացի ևս մեկ հնարավորություն է քննարկվում:

Կոալիցիոն, փոքրամասնության կամ արտահերթ ընտրությունից առաջ ձևավորվող ժամանակավոր կառավարությանը զուգահեռ դիտարկվում է ևս մեկ տարբերակ. այն է՝ արտահերթ ընտրությունների գնալ գործող կառավարությամբ: Այս մասին տեղեկացնում է թուրքական «Haberler» լրատվակայքը:

Աղբյուրը նշում է, որ կոալիցիոն կառավարություն կազմելու գործընթացի ձախողման դեպքում ԱԶԿ-ն հակված չէ ժամանակավոր կառավարություն ձևավորելուն, որի մեջ պետք է ընդգրկվեն խոհրդարան անցած բոլոր կուսակցությունների ներկայացուցիչները:

Այս պայմաններում իշխող կուսակցությունը, համաձայնության գալով ընդդիմադիր կուսակցություններից որևէ մեկի հետ կամ էլ միայնակ, մեջլիսից կպահանջի արտահերթ ընտրություններ որոշում կայացնել: Մեջլիսում ընդդիմադիր «Ազգայնական շարժում կուսակցության» (MHP-ԱՇԿ) ձեռնպահ կամ կողմ քվեարկելու դեպքում ԱԶԿ-ի առաջարկը կընդունվի:

Նշվում է, որ ԱԶԿ-ն ծրագրում է մեջլիսում նման առաջարկություն ներկայացնել կառավարություն ձևավորելու համար սահմանադրությամբ պահանջվող 45-օրյա ժամկետի լրանալուն պես: Այդ կերպ բոլոր կուսակցությունների ներկայացուցիչներից կազմվող ժամանակավոր կառավարության հարցը դուրս կգա օրակարգից:

ԱԶԿ-ի արտահերթ ըննտրությունների առաջարկը քննարկվել է նաև Սահմանադրական հանձնաժողովում, որ նման առաջարկ խորհրդարան ուղարկելու հարցում որևէ խոչընդոտ չի տեսնում:

Աղբյուր` Ermenihaber.am