ERMENI HABER AJANSI

Թուրքիայի Հանրապետության պատմությունը ձախերի կոտորածի պատմություն է: Սկսած 1921 թվականից Թուրքիայի կոմունիստական կուսակցության հիմնադիր կազմի ոչնչացումից միչև այսօր: Իսկ սպանդն իրականացնող խումբն իր առաջին փորձառությունը ձեռք էր բերել Հայոց ցեղասպանության ժամանակ:

Նման դիտարկումով է սկսում Իր «Ձախերի ջարդ, երիտասարդների ջարդ» հոդվածը թուրք գրող, հրապարակախոս, պատմաբան Ռագըփ Զարաքոլուն: Թուրքական «ozgur-gundem» լրատվական կայքում հրապարակված նշյալ հոդվածում հեղինակը հիշեցնում է ձախերի դեմ իրականացված բռնությունները, որոնցից էր 1945 թվականի դեկտեմբերի 4-ին Ստամբուլում իրականացված զանգվածային բռնությունները, որի ընթացքում  երիտասարդ ազգայնականները հրի մատնեցին ձախերին պատկանող թերթերի խմբագրությունները,  գրադարանները:

Ըստ Զարաքոլուի՝ Թուրքիայի պատմությունը նաև երիտասարդների կոտորածի պատմություն է, որը սկսվեց 1965 թվականին «Մորիսոն Սուլեյմանի (Սուլեյման Դեմիրել-խմբ) սուլթանության ժամանակ»:

Առաջին մահապատիժներից հետո, 1976 թվականից Ազգայնական ճակատ կառավարության շրջանում զանգվածային սպանությունները շարունակվեցին:

«Թուրքիայի պատմությունը միևնույն ժամանակ քրդերի կոտորածի պատմությունն է»,- նկատել է տալիս թուրք պատմաբանը՝ հավելոլով, որ 1980 թվականից հետո տեղի ունեցածը ճիշտ և ճիշտ ցեղասպանություն էր՝ կազմակերպված խորքային պետությայնկողմից:

«Իսկ հայերի, հույների, ասորիների, ալևիների, եզդիների ոչնչացումը հանրապետական շրջանից էլ ավելի վաղ է ձգվում»,- գրում է Զարաքոլուն:

Հոդվածի վերջում հեղինակը նշում է, որ արդեն եկել էր նոր երիտասարդություն՝ մաքուր և մտահղացումներով լեցուն: Այդ երիտասարդները գնում էին քանդված Քոբանին կառուցելու, սակայն նրանց էլ հնարավորություն չտրվեց:

«Անիծվի այս համակարգը: Քանի դեռ շարունակվում է անպատժելիությունը, այս երկիրը չի բարգավաճի: Մինչև ցեղասպան պետությունը չլուծարվի, բոլորը Դրակուլայի զզվելի դեմքի հետ են հանդիպելու»,- եզրափակել է Զարաքոլուն: