ERMENI HABER AJANSI

Թուրքիայի նախագահ Ռեջեփ Թայիփ Էրդողանը Չինաստան այցից առաջ տված ասուլիսի ժամանակ հայտարարել է, որ քրդամետ «Ժողովուրդների դեմոկրատական» կուսակցության (HDP-ԺԴԿ) ղեկավարությանը պետք է զրկել պատգամավորական անձեռնմխելիությունից ու պատասխանատվության ենթարկել:

Լրագրողներից մեկի հարցին, թե Էրդողանն ինչպես է վերաբերվում «Ազգայնական շարժում» կուսակցության առաջնորդ Դևլեթ Բահչելիի` քրդամետ կուսակցությունը փակելու մասին արած հայտարարությանը, Էրդողանը պատասխանել է.

«Ես այդ թեմայով ավելի վաղ էլ եմ հայտարարություն արել և այժմ նախագահի պաշտոնում էլ եմ հաստատում իմ դիրքորոշումը` կուսակցություն փակելը սխալ եմ համարում: Սակայն այդ կուսացության առաջնորդները պետք է պատասխան տան այս գործով: Սահմանադրության 14-րդ հոդվածը շատ հարցեր է կարգավորում: Բոլոր նրանք, ովքեր իրենց թիկունքում ահաբեկչական կազմակերպությանը (Քուրդիստանի բանվորական կուսակցություն - EH) աջակցություն են ցույց տալիս, պետք է զրկվեն անձեռնմխելիությունից ու պատասխանատվության ենթարկվեն»:

Ըստ թուրքական «T24» լրատվական կայքի` Էրդողանն ավելացրել է նաև, որ խորհրդարանը պետք է անհրաժեշտ եզրակացություններ անի, ԺԴԿ-ականներին զրկի անձեռնմխելիությունից և ահաբեկչական կազմակերպության (PKK-ՔԲԿ) հետ համագործակցելու համար պատասխանատվության կանչի:

Ս/թ հունիսի 7-ի ընտրությունների արդյունքում նշյալ քրդական կուսակցությունը թուրքական 550 տեղանոց մեջլիսում ստացել է 80 պատգամավորական մանդատ:

Հիշեցնենք, որ հուլիսի 20-ին Սուրուչի ահաբեկչությամբ Թուրքիայում սկիզբ առած ներքին լարվածությունն էլ ավելի սրվեց, երբ հուլիսի 24-ին թուրքական F-16 կործանիչները  Սիրիայում «Իսլամական պետություն» (ԻՊ) ահաբեկչական կազմակերպության դիրքերը ռմբահարելուց  հետո, ավիահարվածներ հասցրեցին նաև Հյուսիսային Իրաքում գտնվող «Քուրդիստանի բանվորական» կուսակցության (PKK-ՔԲԿ) ռազմական ճամբարների ուղղությամբ: Դրանից հետո էլ Թուրքիայի տարբեր նահանգներում չեն դադարում ՔԲԿ-ի զինյալների կողմից իրականացվող վիրժառության գործողությունները: