Անկարայի հայկական գերեզմանատունը ավերել են ու դարձրել խնջույքի վայր

10:52, 08 Ապրիլ 2015

Անկարայի հայկական գերեզմանատունը ավերել են ու դարձրել խնջույքի վայր

Անկարայում հայերից մնացած գերեզմանատունը գանձախույզների գործունեության հետևանքով քարուքանդ է եղել: Գերեզմանոցի ողջ տարածքով մարդկային ոսկրակտորներ են ցիրուցան եղած:

Ըստ թուրքական «Մուլքիյե հաբեր» լրատվակայքի` նշյալ գերեզմանատունն Անկարայի շրջակայքում գտնվող և ժամանակին ամբողջությամբ հայերով բնակեցված (4.000 բնակիչ) Իսթանոզ ավանի միակ պահպանված հայկական գերեզմանատունն էր:

Աղբյուրը հայտնում է, որ Անկարայի Սինջան շրջանի թաղապետարանը, որի ենթակայության տակ է գտնվում գերեզմանատան տարածքը, տարիներ առաջ տապանաքարերը տեղափոխել է թաղապետարանի այգի` հիմնելով «բաց երկնքի թանգարան»: Դրանից որոշ ժամանակ անց, ըստ տարածված տեղեկությունների, նշյալ շիրմաքարերը տեղափոխվել են Անատոլիայի քաղաքակրթությունների թանգարան:

Հայկական գերեզմանատան տարածքը մի քանի տարի առաջ ցանկապատվել է, սակայն անհրաժեշտ պահպանություն չիրականացվելու պատճառով այդ ցանկապատերից գրեթե ոչինչ չի մնացել: Գերեզմանատան մի հատվածն էլ միացվել է շրջակայքում հաստատված բնակիչների այգիներին:

«Գերեզմանները գանձախույզների պատճառով այժմ քարուքանդ վիճակում են. ողջ տարածքում ցիրուցան եղած ոսկորներ են: Սա կարծես քիչ էր, շաբաթվա վերջին գերեզմանոցը խնջույքի վայր դարձնողներ էլ կան»,- գրում է թուրքական լրատվամիջոցը: