Թուրք նախարար. «Հայ-թուրքական արձանագրությունները շարունակում են մնալ Թուրքիայի օրակարգում»

Քաղաքական08:35, 27 Մարտ 2015

Թուրք նախարար. «Հայ-թուրքական արձանագրությունները շարունակում են մնալ Թուրքիայի օրակարգում»

Թուրքիայի Եվրաինտեգրման հարցերով նախարար և Եվրամիության (ԵՄ) անդամակցության գլխավոր բանագնաց Վոլքան Բոզքըրն Իտալիայում հանդիպել է իտալացի գործընկերոջ Պաոլո Ջենտիլոնիի հետ: Հանդիպումից հետո Բոզքըրը խոսել է լրագրողների հետ՝ ի թիվս այլ հարցերի անդրադառնալով նաև Հայոց ցեղասպանության և հայ-թուրքական հարաբերություններին: Թուրք նախարարնը հերքելով այն փաստը, որ 1915 թվականին տեղի է ունեցել Հայոց ցեղասպանություն, ասել է, որ Թուրքիայի պատմության մեջ ոչ մի ամոթալի դեպք չի եղել:

Բոզքըրը խոսել է Եվրախորհրդարանի (ԵԽ) կողմից Հայոց ցեղասպանության վերաբերյալ բանաձևի մասին, որը քննարկման է դրվելու ապրիլի 15-ին:

Թուրքական «Հյուրիյեթ» թերթի տեղեկացմամբ՝ նախարարը ցանկություն է հայտնել, որ ԵԽ որոշումը հիմք չդառնա այս խնդրի հետագա շարունակման համար: «Մենք ակնկալում ենք հակառակ որոշումներ, որոնք կօգնեն մեզ այս ամենը անցյալում թողնել և հիմք կդառնան, որպեսզի մարդիկ խաղաղության մեջ ապրեն և ապագա կառուցեն»:

Նա կրկնել է թուրք մյուս բարձրաստիճան պաշտոնյաների հաճախակի դարձած հայտարարությունը, թե հարցը պետք է թողնել, պատմաբաններին, որոնցից կազմված հանձնաժողովի որոշումը Թուրքիան պատրաստ է ընդունել:

Խոսելով հայ-թուրքական հարաբերությունների կարգավորման մասին՝ Բոզքըրն ընդգծել է, որ հայ-թուրքական արձանագրությունները շարունակում են մնալ Թուրքիայի օրակարգում, իսկ Հայաստանն այն հետ է կանչել խորհրդարանից: Բոզքըրը հայկական կողմին մեղադրել է գործընթացը կասեցնելու մեջ:

«Այդ փաստաթղթերի տակ դրված է մեր այժմյան վարչապետի ստորագրությունը, ով այն ժամանակ արտգործնախարար էր: Այդ գործընթացը տեղի է ունեցել մեր նախագահի համաձայնությամբ: Սակայն հայկական կողմը, ցավոք, գործընթացը կասեցրել է: Համոզված եմ, որ անձնական զգացումների փոխարեն դատողությունը կհաղթի: Հակառակ դեպքում ԵԽ որոշումը պարզապես թղթի կտոր կլինի»,-ասել է նախարարը:

Աղբյուր` Ermenihaber.am