ERMENI HABER AJANSI

Արևմտահայերի ազգային համագումար (ԱԱՀ) միջազգային հասարակական կազմակերպության նախագահ Սուրեն Սերայտարյանի ելույթ է ունեցել Երևանում կայացած ԱԱՀ 4-րդ համագումարին ընդառաջ համաժողովին, որին մասնակցել են պատգամավորներ և այլ պետական բարձրաստիճան այրեր: Սերայտարյանը ներկաներին հիշեցրել է, որ  նախորդ ժողովին իրենք քննարկել են Հայոց ցեղասպանության հետևանքով արևմտահայերի կրած բարոյական, մարդկային, նյութական, տարածքային վնասների հատուցման ու պահանջատիրության հետ կապված գործունեության ռազմավարական և մարտավարական խնդիրները:

Ժողովում նկատի առնվեցին համաշխարհային և տարածաշրջանային վերջին զարգացումները և ողջ հայությանը սպառնացող մարտահրավերները, միևնույն ժամանակ՝ հայոց ցեղասպանության հարյուրամյակի ոգեկոչման գործողությունները, համշենահայության, դերսիմահայության, ծպտյալ հայերի և մահմեդականություն ընդունած հայերի էթնիկ գիտակցության զարթոնքի ընթացքը: Արդյունքում որոշվել է մինչև 2015թ. ապրիլ ամիսը հրավիրել արևմտահայերի 4-րդ համագումար:

Սերայտարյանն իր ելույթում մանսավորապես ասել է. «Ինչպես գիտեք, Արևմտահայերի ազգային առաջին և երկրորդ համագումարները տեղի են ունեցել  1917 և 1919թթ. Երևանում՝ նպատակ ունենալով լուծել արևմտահայ գաղթականների խնդիրները և կազմակերպել նրանց վերադարձը Արևմտյան Հայաստանի, Կիլիկիայի և Օսմանյան կայսրության մնացած տարածքներ, որտեղից տեղահանվել էին ցեղասպանության ժամանակ: Եվ ահա 2011թ. դեկտեմբերին  Սևր քաղաքում տեղի ունեցավ արևմտահայերի ազգային 3-րդ համագումարը, որը ստեղծեց Արևմտահայերի ազգային համագումար միջազգային հասարակական կազմակերպությունը, այսինքն՝ Օսմանյան կայսրության նախկին հայ քաղաքացիների ժառանգների լիազոր  ներկայացուցչական մարմինը:

Ի՞նչ արժեք ունեն տասնյակ պետությունների կողմից ընդունած ցեղասպանության ճանաչման օրինագծերը, եթե այդ պետությունները անտարբեր են 7 մլն արևմտահայերի իրավունքների՝ արդեն 100 տարի շարունակվող ամոթալի, անընդունելի ոտնահարման հանդեպ: Մենք այլևս նպատակը միջոցի հետ չպիտի շփոթենք»:

Ermenihaber.am