ERMENI HABER AJANSI

ԱՄՆ-ին անհանգստացնում է «Իսլամական պետության» (ԻՊ) հարցում Թուրքիայի անգործությունը: Այս մասին գրում է թուրքական «Ռադիքալ» թերթը՝ հղում անելով ամերիկյան «New York Times»-ում տպագրված նույնանուն հոդվածին, որտեղ հրապարակվել են ամերիկացի պաշտոնյաների կարծիքները:

Հոդվածում նշվում է, որ Թուրքիան սահմանակից սիրիական Քոբանի քաղաքում «ԻՊ»-ի և քրդերի բախումներին միջամտելու համար պայման է դրել, որ ԱՄՆ-ի գլխավորած կոալիցիան պետք է պայքար մղի նաև Սիրիայի նախագահ Բաշար Ասադի դեմ, ինչին հակառակ ԱՄՆ նախագահ Բարաք Օբաման ցանկանում է, որպեսզի Թուրքիան ավելի կոշտ դիրքորոշում որդեգրի «ԻՊ»-ի դեմ և Ասադի հարցը չկապի մյուս խնդիրների հետ:

Ամերիկացի բարձրաստիճան պաշտոնյաներից մեկը նշել է, որ Թուրքիան Սիրիայում մարդկային ողբերգությունը կանխելու ուղղությամբ որևէ քայլ չի կատարում, դրանք չանելու համար անգամ պատճառներ է  հորինում: «Երբ սահմանին այդքան մոտ մի վայր դժոխքի է վերածվում, ՆԱՏՕ-ի դաշնակցի վարքը այդպիսին չպիտի լինի»,- նշված է հոդվածում:

Ամերիկացի պաշտոնյաները նշել են նաև, որ ԱՄՆ պետքարտուղար Ջոն Քերին վերջին 72 ժամվա ընթացքում հեռախոսազրույցներ է ունեցել Թուրքիայի վարչապետ Ահմեթ Դավութօղլուի և արտգործնախարար Մևլութ Չավուշօղլուի հետ՝ սահմանին առկա ճգնաժամին լուծում տալու նպատակով:

ԱՄՆ-ը Թուրքիայի հետ համաձայնության չգալու դեպքում կարող է վտանգել «ԻՊ»-ի դեմ  սուննի մուսուլման երկրների հետ ստեղծած կոալիցիան:

Ermenihaber.am