ERMENI HABER AJANSI

ՄԱԿ-ի գլխավոր ասամբլեայի 69-րդ նստաշրջանում ՀՀ նախագահ Սերժ Սարգսյանի ելույթին առայժմ արձագանքել են միայն Թուրքիայի լրատվական շրջանակները: Պաշտոնական շրջանակները դեռ ոչ մի կերպ չեն արձագանքել: ՄԱԿ-ի ամբիոնից Անկարայի հայ-թուրքական քաղաքականությունը խստապես քննադատած ՀՀ նախագահի ելույթին անդրադարձել են մի շարք իշխանամետ և ընդդիմադիր էլեկտրոնային լրատվամիջոցներ, որոնց թվում են «Աքշամ»-ը, «Սթար»-ը, «Իհլաս»-ը, «Դեմոկրատ հաբեր»-ը, «Հաբեր X»-ը:

ՀՀ նախագահի ելույթի մասին շատ համառոտ լուսաբանումը թուրքական վերոնշյալ կայքերը կատարել են բացառապես նույն բովանդակությամբ տեքստով և նույն շեշտադրությամբ վերնագրերով` «Հայաստանը կարող է հետ կանչել ստորագրությունները արձանագրություններից»:

Անդրադարձ կա Սերժ Սարգսյանի ելույթից երեք առանցքային կետի.

1. Անընդունելի է Թուրքիայի նախապայմանների լեզվով վարած քաղաքականությունը:

2. Ղարաբաղը երբեք չի հանձնվի Ադրբեջանին:

3. Գրողի ծոցը վավերացնեք արձանագրությունները:

Ընդ որում ՀՀ նախագահի ելույթից մեջբերված ուղիղ խոսքից թուրքական կայքերը հանել են «Ազատ Արցախ» արտահայտությունը: Իսկ «գրող»-ին  թուրքերը նույնացրել են սատանայի հետ:

Հիշեցնենք, որ Սերժ Սարգսյանը ՄԱԿ-ի ամբիոնից մասնավորապես սասել էր.

«Հայտնի է, որ պաշտոնական Երևանի նախաձեռնած` Հայաստան-Թուրքիա հարաբերությունների կարգավորման գործընթացը հասավ մինչև Ցյուրիխյան արձանագրությունների ստորագրում: Այդ արձանագրություններն արդեն տարիներ շարունակ դարակներում են` սպասելով Թուրքիայի խորհրդարանի վավերացմանը: Պաշտոնական Անկարան բացահայտ հռչակում է, որ կվավերացնի այդ արձանագրությունները միայն, եթե Լեռնային Ղարաբաղը` Ազատ Արցախը, հայերը հանձնեն Ադրբեջանին: Հայաստանում և Արցախում նման նախապայմաններին պարզ մարդիկ շատ հաճախ արձագանքում են շատ պարզ. «գրողի ծոցը վավերացնեք:

Ելույթն ամբողջությամբ` այստեղ:

Ermenihaber.am