Ալմելոյում թուրքերի հակահայկական ցույցն անհանգստացրել է Հոլանդիայի կուսակցություններին

Միջազգային12:57, 10 Հունիս 2014

Ալմելոյում թուրքերի հակահայկական ցույցն անհանգստացրել է Հոլանդիայի կուսակցություններին

Հոլանդիայի (Նիդերլանդներ) կուսակցությունների ներկայացուցիչները հունիսի 1-ին Ալմելո քաղաքում թուրքերի կողմից կազմակերպված ցույցի առնչությամբ հարցեր են ուղղել կառավարությանը: Տեղեկացնենք, որ թուրքերը ցույց էին կազմակերպել՝ բողոքելով հայկական եկեղեցու բակում Հայոց ցեղասպանության զոհերի հիշատակին նվիրված հուշահամալիրի կառուցման դեմ: Հուշահամալիրի բացումը տեղի էր ունեցել այս տարվա ապրիլի 24-ին:

Թուրքական «Սոն հաբեր» լրատվական կայքի փոխանցմամբ «Քրիստոնեա-դեմոկրատական» (CDA), «Սոցիալիստական» (SP), «Ազատություն» (PVV), «Հոլանդիայի ուղղափառ բարեփոխում» (SGP) և «Քրիստոնեական միություն» (CU) կուսակցությունները կարծում են, որ հունիսի 1-ի ցույցն ամենայն հավանականությամբ կազմակերպվել էր թուրքական իշխանությունների օժանդակությամբ: Այդ իսկ պատճառով պնդում են, որ անհրաժեշտ է հարցի վերաբերյալ տեղեկություններ ստանալ թուրք պաշտոնյաներից:

Նշվում է, որ կուսակցություններին հատկապես անհանգստացրել է ցուցարարների՝ ատելություն պարունակող վանկարկումները, մասնավորապես «Ղարաբաղը հայերի համար գերեզման է դառնալու»:

Որոշ պաշտոնյաներ, հայտնելով, որ Թուրքիայի գլխավոր հյուպատոսությունը և Հոլանդիայում մի շարք մզկիթներ աջակցել են բողոքի ակցիային, պահանջել են, որպեսզի Նիդերլանդների արտգործնախարար Ֆրանս Թիմմերմանսը հանդիպի իր թուրք գործընկերոջ հետ և պարզաբանում ստանա հարցի վերաբերյալ: Բացի այդ պահանջել են հանդիպել նաև Հոլանդիայում Թուրքիայի գլխավոր հյուպատոսի հետ:

Մի շարք պահանջներ են հնչել նաև ուղղված Արդարադատության և անվտանգության նախարար Իվո Օփսթելթենին և ինտեգրման հարցերով պատասխանատու, սոցիալական հարցերի նախարար Լոդևիյկ Ասշերին:

Օփսթելթենից պահանջում են բողոքի ցույցի ժամանակ հնչած արտահայտությունների համար դիմել դատախազություն, իսկ Ասշերից՝ այդ ոլորտում անհրաժեշտ քայլեր ձեռնարկել: