ERMENI HABER AJANSI

Թուրքիայի նախագահ Աբդուլլահ Գյուլը, մասնավոր այցով գտնվելով Միացյալ Նահանգներում, մասնակցել է «Հարվարդ»-ի համալսարանում հրավիրված կոնֆերանսի և հանդես եկել «Տարածաշրջանի օրակարգային խնդիրներ և հայացք ապագային» թեմայով ելույթով: Այնուհետև պատասխանել է ներկաների հարցերին:

Ըստ «Սի Էն Էն թուրք» լրատվական ծառայության` Գյուլը անհարմար կացության մեջ է ընկել, երբ «Հարվարդ»-ի բժշկագիտական ֆակուլտետից Էմեր Ալթընդիշը բավականին կոշտ ու հանդիմանող հարցեր է տվել: Վերջինս Թուրքիայի նախագահին, հիշեցնելով Գեզի զբոսայգու ցույցերի ժամանակ ու դրան հաջորդած մեկ տարվա ընթացքում զոհված քաղաքացիների մասին, հարցրել է. «Այն դեպքում, երբ այդ ամենը տեղի է ունենում, ինչպե՞ս եք դուք այստեղ ժողովրդավարությունից և իրավունքից խոսում:

Հարցը թուրքերեն հնչեցրած Ալթընդիշը համառորեն պահանջել է այն թարգմանել նաև անգլերեն, որպեսզի դահլիճում գտնվող բոլորը (150 մարդ) հասկանան խոսքն ինչի մասին է: Տհաճության մատնված Թուրքիայի նախագահն արձագանքել է. «Հիմա դու ինձ լսիր, ոչ ոք քեզ նման իրավունք չի տա»: Ի պատասխան` Ալթընդիշն ասել է. «Իհարկե, Թուրքիայում լինեի, ծեծ կուտեի սրա համար»:

Ապա Գյուլը փորձել է արդարանալ` նշելով, թե Գեզիի ցույցերը վերածվել էին զանգվածային անկարգությունների, իսկ նման բան բոլոր երկրներում էլ տեղի են ունենում:

Ըստ թուրքական «Մեդյառադար» լրատվականի` սա ավելի է բորոբոքել Էմրե Ալթընդիշին, ով էլ ավելի կոշտ է հակադարձել Գյուլին. «Ձեր ղեկավարած Թուրքիայի Հանրապետությունը սպանել է 8 քաղաքացու, 90 մարդու գլխի ծանր վանսվածքներ պատճառել, և Թուրքիայում դեռ բռնությունները շարունակվում են: Օրական 3 կին է սպանվում, Ռոբոսկի բնակավայրում ձեր ղեկավարած զինուժը 34 մարդ է կոտորել, որոնցից 17-ը` երեխա: Դուք ամոթ չե՞ք անում` ղեկավարելով նման պետություն: Ինչպե՞ս եք այստեղ մեզ ժողովրդավարության մասին ստեր ասում, գիշերներն ինչպե՞ս եք քնում: Բերքին Էվլանը 14 տարեկան էր, ձեր վարչապետը 14-ամյա պատանուն տեռորիստ է ասում»:

Հիշեցնենք, որ Բերքին Էվանը Գեզիի ցույցերի ժամանակ ոստիկանների կողմից սպանված պատանին էր:

Ermenihaber.am