ERMENI HABER AJANSI

Լոբբիստական ուժերի գործունեությունն ուսումնասիրող «Influence Explorer» կազմակերպությունն իր կատարած հետազոտությունների արդյունքում փորձում է պարզել, թե ԱՄՆ-ի իշխանությունների վրա ազդելու համար օտարերկրյա լոբբիստական ուժերը որքան գումար են ծախսում: Կազմակերպությունն արդեն հրապարակել է իր պատրաստած զեկույցը, որտեղ ընդգրկված են ամենաշատ գումարներ ծախսող լոբբիստները:

Այս մասին տեղեկացնող թուրքական «Օդա TV» լրատվականը հայտնում է, որ Թուրքիան ԱՄՆ-ում սեփական շահերից բխող լոբբինգ իրականացնելու համար 2013-ին ծախսել է 1 մլն 743 հազար դոլար, իսկ 2014-ի առաջին հնգամսյակում` 350.000 դոլար:

ԱՄՆ-ում հրատարակվող թուրքերի տպագիր օրգանը` «Փոսթա 212» թերթը, նշում է, որ տարեկան հարյուր միլիոնավոր դոլարներ են ծախսվում, որպեսզի ԱՄՆ-ի իշխանությունները կամ կոնգրեսը այս կամ այն պատվիրատուի շահերից բխող որոշումներ կայացնեն: Այն փաստը, որ Թուրքիայից սնվող լոբբիստական կամզակերպություններն ԱՄՆ-ում ծախսած իրենց գումարների չափով զբաղեցնում են վերոնշյալ զեկույցի առաջին հորիզոնականները, ցույց է տալիս, թե Թուրքիան ինչքան մեծ կարիք ունի ազդելու Վաշինգտոնի վրա:

Նշվում է նաև, որ Միացյալ Նահանգներում թուրքերի իրականացրած լոբբինգի նպատակային գլխավոր թիրախը Հայոց ցեղասպանության ճանաչումը խոչընդոտելն է: Զեկույցի համաձայն` Թուրքիայի կառավարության շահերը Վաշինգտոնում 2014 թվականին ներկայացնում է 2 կազմակերպություն` «Gephardt Group Government Affairs LLC»-ը և «LB International Solutions LLC»-ը: Քանի որ մոտենում է 2015 թվականը` Հայոց ցեղասպանության 100-ամյա տարելիցը, սպասվում է, որ Անկարան ավելի մեծ գումարներ է ստիպված լինելու ծախսել թուրքական շահերին սպասարկող լոբբինգի համար: Բայց դրանից այժմ ԱՄՆ-ում թուրքական ամենաուժեղ լոբբիստական ուժ է համարվում է գյուլենական համայնքը, որը, ինչպես հայտնի է, սուր տարաձայնությունների ու առճակատման մեջ է Էրդողանի վարչակազմի հետ: «Սա էլ ավելի է դժվարեցնում Թուրքիայի գործը»,- եզրակացնում է պարբերականը:

Ermenihaber.am