Թուրք-ամերիկյան պայմանագիրը կարող է հիմք դառնալ Գյուլենի արտահանձման համար

Միջազգային09:19, 02 Մայիս 2014

Թուրք-ամերիկյան պայմանագիրը կարող է հիմք դառնալ Գյուլենի արտահանձման համար

Թուրքիան ԱՄՆ-ից կպահանջի արտահանձնել գյուլենական շարժման առաջնորդ Ֆեթուլլահ Գյուլենին՝ հիմնվելով 1980 թվականի նոյեմբերի 5-ին կնքված պայանագրի վրա: Այս մասին տեղեկացնում է թուրքական «Սաբահ» թերթը:

Արտահանձման պահանջի մեջ կներառվեն նաև Անկարայի գլխավոր դատախազության կողմից «իշխանափոխության փորձ անելու» և «խմբավորում ստեղծելու» մեղադրանքով Գյուլենի նկատմամբ բացված հետաքննությունների մանրամասները: ԱՄՆ օրենքների համաձայն՝ հանցավոր խմբավորում հիմնելը կամ դրան անդամակցելը բավարար պատճառներ են երկրից արտաքսման համար: Արտահանձման համար կարևոր դերակատարում կարող է ունենալ տվյալն անձնավորության ներկայության կամ գործողությունների բացասական ազդեցությունը ԱՄՆ-ի արտաքին քաղաքականության վրա:

Հիշեցնենք, որ Ֆեթուլլահ Գյուլենը 1999 թվականից բնակվում է ԱՄՆ-ում: Թուրքիայի 1997 թվականի փետրվարի 28-ի ռազմական հեղաշրջումից հետո իսլամական այս ազդեցկ գործչի նկատմամբ սկսվեց քրեական հետապնդում, որի պատճառով էլ նա ստիպված եղավ տեղափոխվել ԱՄՆ: Գյուլենը համարվում է արդի իսլամի և ժողովրդավարության սինթեզը կրող ու աշխարհում Թուրքիայի ազդեցությունը ուժեղացնող անձ:

Վերջին շրջանում թուրքական իշխանությունները առճակատման մեջ են գյուլենական ուժերի հետ ու Ֆեթուլլահ Գյուլենին մեղադրում են Թուրքիան վարկաբեկող և պառակտող գործունեություն ծավալելու համար:

Ermenihaber.am