Ավստրալահայ համայնքը բողոքի ցույց է կազմակերպել ընդդեմ Թուրքիայի

Միջազգային13:47, 02 Ապրիլ 2014

Ավստրալահայ համայնքը բողոքի ցույց է կազմակերպել ընդդեմ Թուրքիայի

Ավստրալիայի հայ համայնքի ներկայացուցիչները Սիդնեյում Թուրքիայի հյուպատոսության առջև բողոքի ակցիա են կազմակերպել: Ցուցարարները դատապարտել են Թուրքիայի աջակցությունը սիրիայի ապստամբների շարքերում կռվող ահաբեկչական կազմակերպություններին, որոնց անմիջական մասնակցությամբ տեղի ունեցավ հարձակումը հայաբնակ Քեսաբ ավանի վրա:

Ցույցին մասնակցել են համայնքի մոտ 500 ներկայացուցիչներ՝ ձեռքներին պահած ունենալով «Թուրքիա՛, հրաժարվիր Ալ Քուրալին աջակցելուց», «Աշխարհից արդարություն ենք պահանջում», «Թուրքերն արդեն 99 տարի է հայ են սպանում» և այլ կարգախոսներով պաստառներ: Թուրքական «Մեդյա 365» ինտերնետային լրատվականի հաղորդմամբ՝ «Ավտրալիայի թուրքերի պահպանման միավորում» կազմակերպության գլխավորությամբ հյուպատոսության մոտ են հավաքվել մոտ 70 սիդնեյաբնակ թուրք, որոնք փորձել են անվտանգության օղակ կազմել հյուպատոսության շենքի շուրջ: Մոտ 2 ժամ տևած միջոցառմանը հետևել է ավտրալական ոստիկանությունը:

Հայ համայնքի ներկայացուցիչներից Հայկ Կայսերիյանը, ելույթ ունենալով, խիստ քննադատել է Սիրիայի նկատմամբ Թուրքիայի վարած քաղաքականությունը: Կայսերիյանը հայտարարել է նաև, որ ապրիլի 24-ին կրկին հավաքվելու են Թուրքիայի հյուպատոսության առջև ու կրկին իրենց բողոքի ձայնն են բարձրացնելու:

Ermenihaber.am