Ո՞վ է Թուրքիան ցնցող Ֆեթուլլահ Գյուլենը. ամերիկացի պրոֆեսորի բացահայտումները

Միջազգային08:46, 20 Մարտ 2014

Ո՞վ է Թուրքիան ցնցող Ֆեթուլլահ Գյուլենը. ամերիկացի պրոֆեսորի բացահայտումները

Ամերիկացի պրոֆեսոր, ԱՄՆ Հետաքննությունների դաշնային բյուրոյի աշխատակից Պաուլ Վիլյամսը երկար տարիներ ուսումնասիրել է Ֆեթուլլահ Գյուլենի գործունեությունը և նրա ղեկավարած գյուլենական շարժումը: Վիլյամսը կարողացել է լինել Գյուլենի` Փենսիլվանիայում գտնվող կալվածքում, որը նման է ռազմականացված ամրոցի: Այն գտնվում է 100 զինյալ թուրքերի հսկողության տակ:

Թուրքական «Ակտուել» լրատվական կայքը, անդրադառնալով նշյալ թեմային, նյութ է հրապարակել պրոֆեսոր Վիլյամսի կատարած հետազոտությունների արդյունքների մասին, որոնք վերջինս պատմել է թուրքական «Աքշամ» պարբերականին:

Սկսյալ 1999 թվականից Ֆեթուլլահ Գյուլենը բնակվում է Ամերիկայի Միացյալ Նահանգներում: Այժմ նա տնօրինում է շուրջ 50 մլրդ դոլարի կարողություն: Պրոֆեսոր Վիլյամսի համոզմամբ` Գյուլենը ծառայում է ԱՄՆ-ի կենտրոնական հետախուզության վարչությանը (ԿՀՎ- CIA, Central Intelligence Agency):

Գյուլենի և Թուրքիայի վարչապետ Ռեջեփ Թայիփ Էրդողանի դաշնակցային հարաբերությունները վերածվեցին թշնամական հակամարտության «Մավի մարմարա»-ի դեպքերից հետո Թուրքիայի ցուցաբերած վարքի և Սիրիայի հարցում որդեգրած քաղաքկաանության պատճառով:

Ըստ Վիլյամսի` 34 տարի առաջ թուրքական բանակի գեներալ Քենան Էվրենը սկսեց մի շարժում, որը հարում էր այն ժամանակվա ԱՄՆ ազգային անվտանգության հարցերով նախագահի գլխավոր խորհրդական Զբիգնև Բժեզինսկու` Միջին Ասիայում եղած թուրքական պետությունների համար նոր կարգ հաստատելու գաղափարին: Այդ գաղափարին ռեալ ընդառաջ գնացողը եղավ Ֆեթուլլահ Գյուլենը: Արդյունքում տարածաշրջանի բնական գազի ու նավթի պաշարների հսկողությունը ԱՄՆ-ին հանձնել կարողանալու նպատակով միջինասիական թուրքական պետություններում գյուլենական դպրոցներ բացվեցին:

«Գյուլենը բազմնիցս խոսում է օսմանական կարգի վերականգնման կամ էլ նոր իսլամական աշխարհակարգի ստեղծման մասին և հետաքրքիրն այն է, որ ԿՀՎ-ն կիսում է այդ տեսակետը: Հակառակ դեպքում ԿՀՎ-ի մասնագետներն ի՞նչ գործ ունեն Ադրբեջանում, Թուրքմենստանում, Ղրղզստանում, Ուզբեկստանում և Ղազախստանում եղած գյուլենական դպրոցներում: Այդ պատճառով է, որ Ռուսաստանը և Ուկրաինան փակեցին Գյուլենի դպրոցները իրենց տարածքներում: Գյուլենի դպրոցներում 130 ԿՀՎ գործակալ է աշխատում: Դպրոցները ֆինանսավորվում են թմրանյութերի և զենքի մաքսանենգության միջոցով» ամերիկացի պրոֆեսորի խոսքերն է մեջբերում կայքը:

Ermenihaber.am