ERMENI HABER AJANSI

Ղրիմի թաթարների առաջնորդ Մուստաֆա Քըրըմօղլուն այցելել է Թուրքիա և հանդիպել վարչապետ Ռեջեփ Թայիփ Էրդողանի և արտգործնախարար Ահմեթ Դավութօղլուի հետ:

Էրդողան-Քըրըմօղլու հանդիպումը տեղի է ունեցել Իզմիրում: Հանդիպման ընթացքում վարչապետն ընդգծել է, որ Թուրքիան միայնակ չի կարող միջամտել ղրիմյան զարգացումներին:

«Թուրքիան, ինչպես Արևմուտքը, ցանկանում է, որպեսզի Ուկրաինայի տարածքային ամբողջականությունը պահպանվի: Եթե այս  հարցում ՆԱՏՕ-ն, որի անդամ է նաև Թուրքիան, որևէ որոշում կայացնի, ապա մենք էլ դրան համապատասխան կգործենք»,- Էրդողանի խոսքերը մեջբերել է թուրքական «Թելլալ» լրատվական կայքը:

Էրդողանը Քըրըմօղլուին հայտնել է, որ ավելի վաղ Ռուսաստանի նախագահ Վլադիմիր Պուտինի հետ հեռախոսազրույց է ունցել, որի ժամանակ նշել է, որ Թուրքիան Ղրիմի թաթարների կողքին է լինելու և պատրաստ է ամեն տեսակի գործողության, որպեսզի թաթարները որևէ վնաս չկրեն:

Ղրիմի թաթարների առաջնորդը և՛ Էրդողանին, և՛ Դավութօղլուին տեղեկացրել է, որ թաթարները հանրաքվեին չեն մասնակցել: Ըստ Քըրըմօղլուի բնորոշման՝  հանրաքվեի սցենարն այլ տեղ էր գրվել, թվերն էլ այլ տեղից են թելադրել:

Նա, անդրադառնալով Ռուսաստանի՝ թաթարներին  ավելի շատ արտոնություններ տալու խոստումներին, նշել է, որ  իրենք Պուտինին չեն հավատում և քանի որ իրենց համայնքը փոքր է, ի վիճակի չեն Ռուսաստանի հետ պատերազմել:

Ermenihaber.am