ERMENI HABER AJANSI

Միջին Արևելքի ամենամեծ հայկական եկեղեցին համարվող Դիարքբեքիրի Սուրբ Կիրակոս եկեղեցին մնացել է առանց հոգևոր հովվի, այդ պատճառով էլ եկեղեցում կանոնավոր ծիսական արարողություններ չեն արվում:

Եկեղեցին 32 տարի դադարից հետո 3 տարի առաջ վերաբացվել է Սուրբ Կիրակոս հայկական հիմնադրամի ջանքերով: Հիմնադրամի ղեկավար խորհրդի անդամ Գաֆուր Թյուրքայի պնդմամբ` իրենք արդեն  այս հարցով դիմել է Պոլսո պատրիարքությանը, սակայն այնտեղից իրենց տեղեկացրել են, որ պատրիարքարանը հոգևորականների քանակի առումով խնդիր ունի, ու պատճառով դեռևս ոչ մեկին չեն կարող նշանակել: 

Թուրքայը թուրքական «Անադոլու » լրատվական գործակալությանը տված հարցազրույցում հիշեցրել է, որ եկեղեցին վերաբացվել է 2011 թվականին և բացումից ի վեր եկեղեցում պատարագ մատուցվում է միայն հատուկ օրերին և կրոնական տոների ժամանակ, երբ Ստամբուլից հատուկ հոգևորական է հրավիրվում:

Նա ասել է, որ  քանի որ Թուրքիայում ճեմարաններ չեն գործում, հոգևորական դառնալ ցանկացողները Երուսաղեմում են կրթություն ստանում:
«Մենք չգիտենք, թե մեր եկեղեցում երբ հոգևորական կնշանակեն: Սա շատ կարևոր եկեղեցի է, և այստեղ պետք է կանոնավոր պատարագ մատուցվի» ,-ասել է նա:

Հիշեցնենք, որ Սուրբ Կիրակոս եկեղեցին կառուցվել է 1376թ.: Եկեղեցու զանգակատունը բարձր է եղել շրջակա մզկիթների աշտարակներից, այդ պատճառով մահմեդականները1915-ին հրետակոծել և մասամբ փլուզել են այն: Առաջին աշխարհամարտի տարիներին գերմանական զորքերի համար եկեղեցու շենքը ծառայել է որպես զինվորական շտաբ: Իսկ հետպատերազմյան տարիներին հայկական այդ եկեղեցին օգտագործվել է որպես բամբակի պահեստ:

2011 թ.-ին եկեղեցին 32 տարվա դադարից հետո նորից բացել է իր դռները հավատացյալների համար:

Ermenihaber.am