Թուրքիան, Վրաստանը և Ադրբեջանը վճռական են տրանս-անատոլիական խողովակաշարի կառուցման հարցում

Տարածաշրջան07:29, 21 Հունվար 2014

Թուրքիան, Վրաստանը և Ադրբեջանը վճռական են տրանս-անատոլիական խողովակաշարի կառուցման հարցում

Թուրքիայի նախագահ Աբդուլլահ Գյուլի հրավերով պաշտոնական այցով Թուրքիայում է գտնվում Վրաստանի նախագահ Գիորգի Մարգվելաշվիլին:

Թուրքիայի նախագահական նստավայրում ի պատիվ Վրաստանի նախագահի ընթրիք է մատուցվել, որի ժամանակ ելույթ է ունեցել Թուրքիայի նախագահը Աբդուլլահ Գյուլը: Վերջինս կարևորել է, որ Մարգվելաշվիլին իր առաջին արտասահմանյան այցը հենց Թուրքիա է կատարել: Գյուլը, մեջբերելով թուրքական ասացվածքը, թե միասնությունը ուժ է ծնում, համոզմունք է հայտնել, որ երկու երկրները դա ցույց են տվել ամուր համագործակցությամբ թե՛ «Սևծովյան տնտեսական համագրոծակցություն» կազմակերպության շրջանակներում, թե՛ տարածաշրջանային այլ նախագծերում:

Այս մասին տեղեկացնող թուրքական «Միլլիյեթ» թերթը գրում է, որ նախագահ Գյուլը խոսել է նաև համատեղ իրականացվող նախագծերի մասին: Գյուլն ընդգծել է, որ այս տարի ցանկանում են ավարտին հասցնել Բաքու-Թբիլիսի-Կարս երկաթգծի կառուցումը: Ըստ Գյուլի՝ Թուրքիան, Վրաստանը և Ադրբեջանը վճռական են տրամադրված «Տրանս-անատոլիական խողովակաշար» (TANAP) նախագիծը կյանքի կոչելու հարցում:

Գյուլը հավելել է, որ այդ նախագծերը Հարավային Կովկասը կկապեն աշխարհին և կամրապնդեն տարածաշրջանի կայունությունն ու բարօրությունը:

Տեղեկացնենք, որ թուրքական լրատվական կայքերը Վրաստանի հետ հարաբերությունների սերտացման և զարգացման Անկարայի քայլը դիտարկում են Հայոց ցեղասպանության համատեքստում: Այն համարում են «1915-ի հոգեբանական պատերազմում» Անակարայի առաջին քայլն՝ ուղղված 2015-ին հայերի կողմից ծրագրված հակաթուրքական լայն արշավներին:

Ermenihaber.am