Խոլորձի մանուշակագույն տեսակը ստացել է Էրդողանի ու նրա կնոջ անունը (տեսանյութ)

Միջազգային09:01, 10 Հունվար 2014

Խոլորձի մանուշակագույն տեսակը ստացել է Էրդողանի ու նրա կնոջ անունը (տեսանյութ)

Հեռավոր արևելյան աշխատանքային ուղևորության շրջանակներում Թուրքիայի վարչապետ Ռեջեփ Թայիփ Էրդողանն այցելել է Սինգապուր, հանդիպում ունեցել օրենսդիր մարմնի ղեկավարության հետ: Այնուհետև Թուրքիայի վարչապետին և նրա տիկնոջը` Էմինե Էրդողանին, առաջարկվել է զբոսանքի դուրս գալ Սինգապուրի նշանավոր բուսաբանական այգում:

Թուրքական «Հյուրրիյեթ» պարբերականը տեղեկացնում է, որ, ի պատիվ Թուրքիայից ժամանած զույգի, խոլորձի (օրխիդեա) ենթատեսակներից մեկին` մանուշակագույն ծաղկատեսակին, տրվել է Թայիփ-Էմինե Էրդողան անունը: Նախկինում նման պատվի արժանացել են Մեծ Բրիտանիայի վարչապետ Մարգարետ Թետչերը և Հարավաֆրիկյան Հանրապետության առաջին սևամորթ նախագահ Նելսոն Մանդելան:

Նշենք, որ Վանդա Միսս Ջոակիմ անունը կրող խոլորձի տեսակը, որը հայտնի է նաև որպես «Սինգապուրյան խոլորձ» և հանդիսանում է այդ երկրի ազգային խորհրդանիշը, իր անունը ստացել է` ի պատիվ Սինգապուրում բնակվող հայազգի ծաղկաբույծ Ագնես Ջոակիմի (Աշխեն Հովակիմյան), ով հայտնաբերել է այդ ծաղկատեսակը: Աշխեն Հովակիմյան ծնվել է 1854թ. ապրիլի 7-ին Սինգապուրում Բարսեղ և Ուրելիա Ջոակիմների (Հովակիմյան) ընտանիքում: