Independent. Էրդողանի ապագան վտանգի տակ է

Քաղաքական11:04, 20 Դեկտեմբեր 2013

Independent. Էրդողանի ապագան վտանգի տակ է

Թուրքիայի վարչապետ Ռեջեփ Թայիփ Էրդողանի ապագան վտանգի տակ է: Նման դիտարկում է արել բրիտանական հեղինակավոր «Independent» պարբերականը: Ապագայի վտանգված լինելը բացատրվում է այն հակամարտությամբ, որ սկիզբ է առել Էրդողանի և նրա նախկին դաշնակից գյուլենական շարժման առաջնորդ Ֆեթուլլահ Գյուլենի միջև:

Օրերս Անկարայում և Ստամբուլում իրականացված խոշորամասշտաբ ոստիկանական օպերացիան պարբերականը բնութագրել է որպես «տգեղ ամուսնալուծության առաջին կրակոց»: Կոռուպցիայի ու կաշառակերության բացահայտմանն ուղղված նշյալ օպերացիայի արդյունքում, ի թիվս այլոց, ձերբակալվել էին Թուրքիայի երեք գործող նախարարների որդիները նաև:

Տեսակետ կա, որ դա Գյուլենի պատասխան էր Էրդողանի կառավարությանը` գյուլենական դպրոցները փակելու նախաձեռնության կապակցությամբ: Պարբերականը նկատել է տալիս, որ ընտրություններից առաջ արդեն օրակարգ է գալիս հարց, թե Գյուլեն-Էրդողան բռնկված հակամարտության ժամանակ երկրի մահմեդական մեծամասնությունը որ կողմին կաջակցի:

Փորձագետների կարծիքով, եթե մինչև հիմա ընտրությունների նախաշեմին խոսվում էր Էրդողանի շուրջ 50 տոկոսանոց ընտրազանգվածի մասին, ապա այդ սկանդալից հետո տոկոսային հարաբերությունը կարող է փոխվել ի վնաս Էրդողանի:

«Արդարություն և զարգացում կուսակցության քարոզարշավներն ամբողջովին հենված են շինարարական մեգանախագծերի և առանց դադարի առաջխաղացման հետ: Բայց արդեն պարզվում է, որ նույն կառավարությունը հիմա մեղադրվում է ապօրինության մեջ նույն այդ սեկտորում»,- գրում է աղբյուրը:

Նշենք, որ Ֆեթուլլահ Գյուլենի գլխավորած գյուլենական շարժումը հզոր իսլամական շարժում է, որը հարյուրավոր դպրոցներ ունի աշխարհի բազմաթիվ իսլամական երկրներում: Այն համարվել է Թուրքիայում իշխող «Արդարություն և զարգացում» կուսակցության քաղաքական հենարանը: Շարժումը քարոզում է իսլամական չափավորություն, հանդուրժողականություն, միջկրոնական երկխոսութուն, իսլամի և ժողովրդավարության համատեղելիություն: Կարծիք կա, որ Գյուլենը մեծ ազդեցություն ունի թուրքական կառավարության և ուժային կառույցների վրա: