ERMENI HABER AJANSI

Թուրքիայի իշխանությունները ծրագրել են 2014 թվականին դիվանագիտական մեծ ծավալի աշխատանքներ իրականացնել արտաքին քաղաքականությունում նախանշված 5 թիրախային ուղղություններով: Այս մասին տեղեկացնող թուրքական «Աքշամ» պարբերականը նշում է, որ Անկարայի 2014 թվականի արտաքին քաղաքական օրակարգում տեղ են զբաղեցնելու Իրաքի, Սիրայի, Եվրամիության, Հայաստանի և Կիպրոսի խնդիրները:

1. Իրաք

Անկարան կարևորում է Իրաքի հետ էներգակիրների հարցով համագործակցության հանգամանքը, քանի որ դա կարևոր դեր ունի Թուրքիայի` էներգետիկ կամուրջ լինելու գործում: 2014-ին ստորագրվելու են պայմանագրեր, որոնք նախատեսում են Իրաքի հյուսիսում գտնվող նավթի և բնական գազի պաշարները Թուրքիայի տարածքով դուրս բերել համաշխարհային շուկա:

2. Սիրիա

Թուրքիան շարունակելու է ակտիվ քաղաքականություն վարել Սիրիայի ներքին պատերազմը դադարեցնելու ուղղությամբ: Մասնավորապես փորձելու է անել ամեն հնարավորը Սիրիայի ընդդիմադիր ուժերին 2014-ի հունվարին կայանալիք Ժնև-2 միջազգային խաղաղ համաժողովին մասնակից դարձնելու համար:

3. Եվրամիություն (ԵՄ)

ԵՄ-ի հետ նոր թափով են շարունակվելու Թուրքիայի եվրաանդամակցության գործընթացն առաջ մղելու համար: Մասնավորապես նախատեսվում է բանակցություններում ավելացնել նվազագույնը երեք նոր գլուխ, որոնց թվում կլինի վիզային ռեժիմի ազատականացումը:

4. 2015. կրիատիկական շրջան

2014 թվականին Հայաստանի հետ հարաբերությունների կարգավորման գործըթնացը օրակարգում կլինի: Բաքվի հետ միասին գործի դրվող պրոցեսում Անկարան ցանկանում է բացել սահմանը, եթե Երևանը դուրս բերի իր ուժերը «ադրբեջանական շրջաններից առնվազն մեկից»: Այդպիսով Անկարան Հայոց ցեղասպանության 2015-ին 100-ամյա տարելիցը կդիմավորի առանց մեծ ճգնաժամերի առաջացման:

5. Կիպրական հարց

Գրեթե 50 տարի անլուծելի մնացած Կիպրական հարցը Անկարան նախատեսում է վերջնականապես լուծել 2014-ի գարնանը, որով և կվերացնի իր եվրաինտեգրման ճանապարհի գլխավոր խոչընդոտը: Անցյալ շաբաթ արտգործնախարար Ահմեթ Դավութօղլուի` Աթենք և «Հյուսիսային Կիպրոսի Թուրքական Հանրապետություն» կատարած այցերը հենց նպատակ էին հետապնդում արագացնել լուծման գործընթացը:

Ermenihaber.am