Դավութօղլուն փորձելու է հարթել թուրք-ամերիկյան հարաբերություններում առկա լարվածությունը

Միջազգային14:04, 19 Նոյեմբեր 2013

Դավութօղլուն փորձելու է հարթել թուրք-ամերիկյան հարաբերություններում առկա լարվածությունը

Վերջին ամիսներն թուրք-ամերիկյան հարաբերություններում նկատված լարվածության ֆոնին երկու կարևոր նշանակության պատվիրակություններ են մեկնում ԱՄՆ մայրաքաղաք: Նման դիտարկում է արել թուրքական «Միլլիյեթ» օրաթերթը:

Թուրքիայի արտգործնախարար Ահմեթ Դավուօղլուի երկօրյա պաշտոնական այցը Միացյալ Նահանգեր արդեն մեկնարկել է, իսկ մինչև նոյեմբերի վերջ էլ Թուրքիայի գլխավոր ընդդիմադիր ուժի` «Ժողովրդահանրապետական» կուսակցության նախագահ Քեմալ Քըլըչդարօղլուն է մեկնելու ԱՄՆ:

Պարբերականը նկատել է տալիս, որ Դավութօլղուի և Քըլըչդարօղլուի ամերիկյան այցի օրակարգի որոշ ընդհանրություններ կան: Օրինակ` երկուսն էլ ելույթ են ունենալու աշխարհում ամենահեղինակավոր վերլուծական կենտրոն ճանաչված «Բրուքինգս» ինստիտուտում:

Դավութօղլուն հանդիպումներ է անցկացնում ԱՄՆ պետքարտուղարի, պաշտպանության նախարարի, Սպիտակ տան ազգային անվտանգության հարցերով խորհրդականի հետ:

Նշվում է, որ ԱՄՆ-Թուրքիա հարաբերություններում սառեցում, ապա նաև լարվածություն նկատվեց ամռան սկզբին Գեզիի իրադարձություններից հետո, երբ հակակառավարական ցույցերի հուժկու ալիքը թուրքական իշխանությունները բիրտ ուժի գործադրմամբ ճնշեցին: Երկու երկրների միջև որոշակի անհամաձայնություն կա նաև Սիրիայի հարցում: Իսկ երբ վերջերս հակաօդային պաշտպանության համակարգերի (ՀՕՊ) հայտարարված պետմրցույթում Թուրքիան նախապատվությունը տվեց չինացիների հետ ռազմատեխնիկական համագործակցությանը, էլ ավելի խորացավ ճգնաժամը հարաբերություններում:

«Այժմ Դավութօղլուն վաշինգտոնյան իր պաշտոնական հանդիպումներում պետք է փորձի հարթել երկկողմ հարաբերություններում առկա խնդիրները»,- գրում է «Միլլիյեթ»-ը

Ermenihaber.am