Էրդողանը պատկերվել է Հոլանդական թերթի գովազդային էջերում

Միջազգային14:00, 18 Հոկտեմբեր 2013

Էրդողանը պատկերվել է Հոլանդական թերթի գովազդային էջերում

Թուրքիայի վարչապետ Ռեջեփ Թայիփ Էրդողանը աշխարհի առաջնորդների հետ միասին հայտնվել է հոլանդական հայտնի Մետրո թերթի գովազդային էջերում: Թերթի՝ աշխարհի լիդերների մասնակցությամբ պատրաստված գովազդային շարքում Էրդողանը պատկերվել է Տիբեթի աքսորված առաջնորդ Դալայ Լամայի հետ կայարանում մետրոյի սպասելիս: Նկարում նրանց կողքին պատկերված է նաև Մետրո թերթը կարդացող մի հոլանդացի:

Նշյալ թերթի այլ գովազդային շարքերում տեղ են գտել նաև այլ առաջնորդներ. ԱՄՆ նախագահ Օբաման պատկերված է կանգառում ավտոբուս նստել պատրաստվելիս: Թերթի մեկ այլ գովազդում էլ պատկերված են Գերմանիայի կանցլեր Անգելա Մերկելը իր դիմաց նստած Ռուսաստանի նախագահ Վլադիմիր Պուտինի հետ խոսելիս: Իսկ Մերկելի կողքին նստած կաթոլիկ աշխարհի հոգևոր առաջնորդ Ֆրանցիսկոս Պապը նայում է դիմացի նստարանին նստած Հոլանդիայի քաղաքացուն:

Թուրքական «Հաբերլեր» էլեկտրոնային պարբերականի հաղորդմամբ՝ առաջնորդների գովազդային շարքը առանց արձագանք չի մնացել: Կարծիքների մեծամասնության համաձայն՝ Էրդողանն ու Օբաման աչքի են ընկնում վատատեսական ու մտածկոտ դեմքի արտահայտությամբ, իսկ Մերկելն ու Պուտինը ավելի ուրախ ու երջանիկ են երևում:

Ermenihaber.am