ERMENI HABER AJANSI

Թուրքական «Սաբահ»-ի հաղորդմամբ` Ամերիկայի թուրքական միությունների ֆեդերացիայի նախագահ Ալի Չընարը Թուրքիայում տեղի ունեցած «Արտերկրում բնակվող թուրքերի համերաշխություն» խորագրով կոնֆերանսի ժամանակ անդրադարձել է Ամերիակայի և այնտեղ բնակվող թուրքերի` Գեզի այգու հետ կապված մոտեցումներին:

Չընարն ասել է, որ ԱՄՆ հասնող լուրերը ամբողջապես չեն արտացոլում Գեզիի դեպքերի իրական էությունը:  Ամերիկայի թուրքական միությունների ասամբլեայի նախագահ Էրգուն Քըլըկովալըն էլ ասել է, որ լրատվամիջոցները CNN-ի New York Times-ի գլխավորությամբ Թուրքիայի դեպքերը շարունակում են ներկայացնել իբրև Թուրքիայում ծավալվող ներքին պատերազմ:

Թուրքական կազմակերպությունների ղեկավարները հայտարարել են, որ ԱՄՆ-ի արձագանքներից հետո նրանք հանդիպում են կոնգրեսականների ու սենատորների հետ` նրանց ճիշտ տեղեկություններ տալու նպատակով: Ալի Չընարն էլ ավելացրել է, որ ցավում են, որ որոշ թուրքեր  New York Times-ում հայտարարություններ անելով, ստվեր են գցում իրենց երկրի համբավի վրա:

Չընարը անդրադարձել է նաև հայկական ու հունական լոբբիին` զգուշացնելով, որ հնարավոր է` վերջինների ջանքերով ԱՄՆ  կոնգրեսում էլ ներկայացվի Եվրոպական խորհրդարանում Գեզի այգու դեպքերի վերաբերյալ ընդունված բանաձևի նման մի բանաձև: Չընարը տեղեկացրել է, որ բանաձևի կանխարգելման նպատակով իրենք լրատվական կազմակերպություններին ամբողջական պատկերն արտացոլող և դեպքերի իրական դրդապատճառները ներկայացնող նամակներ են գրում: 

Ermenihaber.am