Financial Times. «Էրդողանն ավելի շատ նման է Պուտինին, քան Աթաթուրքին»

Միջազգային08:16, 13 Հունիս 2013

Financial Times. «Էրդողանն ավելի շատ նման է Պուտինին, քան Աթաթուրքին»

Թուրքական «Վաթան» պարբերականն անդրադարձել է Գեզի զբոսայգու վերաբերյալ արտասահմանյան մամուլում տեղ գտած հոդվածներին` մասնավորապես ուշադրությունը սևեռելով բրիտանական մամուլին:

«Վաթան»-ի տեղեկացմամբ` «Financial Times» թերթը «Էրդողանը համառության պատճառով իր քաղաքական ժառանգությունը դնում է վտանգի տակ» հոդվածում գրում է, որ Թուրքիայի համբավը, որպես «տարածաշրջանային բարեփոխիչ ուժ», տուժել է, իսկ ԵՄ (Եվրամիություն) հետ հարաբերություններն էլ վտանգված են:

Ըստ անգլիական թերթի դիտարկման, եթե վարչապետ Էրդողանը շարունակի միմյանց դեմ հանել անհայտ սպեկուլյանտներին և գործարար աշխարհին, ապա դժվարությամբ ձեռք բերված տնտեսական կայունությունը հօդս կցնդի:

«Էրդողանը խիզախությամբ ձեռնարկեց «Քուրդիստանի բանվորական կուսակցության» (ՔԲԿ- PKK) հիմնախնդրի լուծման գործընթացը: Այն հիմնախնդրի, որը վերջին 30 տարվա ընթացքում 40.000 մարդու կյանք էր խլել: Այդ նախաձեռնությունը ներառում է նաև քրդերին ավելի շատ ազատություններ ընձեռելու հնարավորություն: Սակայն անհնար է հասկանալ, թե ինչպես կարող է Էրդողանը քրդերին ավելի շատ ազատություն ընձեռել, երբ բնակչության մնացյալ հատվածի նկատմամբ սահմանափակումներ է կիրառում:

Էրդողանը և´ փողոցում, և´ քվեարկության ժամանակ աջակցություն է վայելում: Եթե ցանկանա, ամեն բան ավերելով կարող է անցնել: Սակայն այս պայմաննեում իր հեղինակությամբ ղեկավարելու է մի երիկիր, որի հասարակական համակարգը ճեղքեր է տալիս: Նա ավելի շատ նման է Վլադիմիր Պուտինին, քան Աթաթուրքին: Այդպիսի էրդողանի Թուրքիան շատ ավելի տարբեր է լինելու այն երկրից, որը վերջին 10 տարվա վարչապետության շրջանում բարձր գնահատականների էր արժանանում»,- եզրափակում է անգլիական թերթը: