Միջազգային09:44, 12 Հունիս 2013

Թուրք գործիչը կոչ է արել ոտքի հանել դիվանագետներին` պայքարելու հայերի դեմ

Թուրքական «Հաբերլեր» լրատվական կայքը հայտնում է, որ հայերը Ժնևի վրա ճնշում են գործադրում հուշարձան կանգնեցնելու համար: Արևմտյան Շվեյցարիայի կազմակերպությունների միության նախագահ Ջելալ Բայարը նախազգուշացրել է, որ հայերը ՄԱԿ-ի հարևանությամբ գտնվող «Արիանա զբոսայգում» ցանկանում են հուշարձան կանգնեցնել:

Ջելալ Բայարը հայտնել է, որ այն վայրում, որտեղ պետք է տեղադրվի հուշարձանը, անմիջապես վերջինիս հետևում գտնվում է հայտնի հնդիկ առաջնորդ Գանդիի արձանը: Ըստ Բայարի` Գանդիի արձանի հարևանությամբ նման հուշարձանի կանգեցնումն ամբողջովին հակասում է Գանդիի գաղափարներին:

«Ռազմավարական նշանակություն ունեցող վայրում նման հուշարձանի տեղադրման դեպքում այն միջազգային հնչեղություն կստանա: Քանի որ ՄԱԿ-ի համաձայնագիրը ուժի մեջ է մտել 1945 թվականին, իսկ այդ դեպքերը տեղի են ունեցել 1915թ.-ին, հետևաբար այդ ցանկությունն անօրինական է: Ես սա համարում եմ հայակական սադրանք: Այս դեպքում մեր դիվանագետները պետք է լավ աշխատեն, այս հարցը անգամ ՄԱԿ-ի գլխավոր քարտուղարին պետք է հասցնել: Նախաձեռնությունը պատկանում է Ժնևի հայկական համայնքին է: Մեզ հայտնի է, որ Ժնևի հայկական համայնքն այդ հուշարձանի համար 120 հազար շվեյցարական ֆրանկի օգնություն է ցուցաբերել: Մյուս կողմից կարևոր է նշել, որ ես նրանց առաջարկել եմ միասին եղբայրության հուշարձան կառուցել, սակայն առաջարկս մերժել են: Դիվանագիտությունը ժամ առաջ գործի պետք է անցնի` հետո պահը կարող է կորցնենք»,- ասել է Ջելալ Բայարը:

Ermenihaber.com