Թուրքիայի ռազմական ծախսերն աճում են

Միջազգային14:37, 15 Ապրիլ 2013

Թուրքիայի ռազմական ծախսերն աճում են

Ստոկհոլմի խաղաղության հետազոտությունների միջազգային ինստիտուտի հրապարակած տվյալների համաձայն1998 թվականից հետո առաջին անգամ աշխարհում կատարվող ռազմական ծախսերի հանրագումարը նվազում է արձանագրել:

Ռազմական ծախսերը նվազեցրած երկրներից են ԱՄՆ-ը, Արևմտյան և Կենտրոնական Եվրոպայի երկրները,Ավստրիան, Կանադան և Ճապոնիան: Այս ամենի հետ մեկտեղ Ասիայի, Արևելյան Եվրոպայի, Հյուսիսային Աֆրիկայի և Լատինական Ամերիկայի երկրները մեծացրել են իրենց ռազմական ծախսերը: Ընդհանուր առմամբ, սակայն, աշխարհում ռազմական ծախսերը նվազել են:

Թուրքական «Ջումհուրիյեթ» թերթի փոխանցմամբ Թուրքիան գտնվում է ռազմական ծախսերի աճ արձանագրող երկրների շարքում:

2010 և 2011 թվականին Թուրքիայի ռազմական ծախսերը կազմել են համապատասխանաբար 16.9 և 17.6 միլիարդ դոլար: Անցած տարի առաջին անգամ Թուրքիայի ռազմական ծախսերը հատել են 18 միլիարդ դոլարի սահմանը`կազմելով 18 միլիարդ 184 միլիոն դոլար, որ 2.8 տոկոսով ավել է 2011 թվականի ծախսերից:

Ermenihaber.am