ERMENI HABER AJANSI

Թուրքիայի ազգային մեծ ժողովում (ԹԱՄԺ-TBMM) պատգամավորները ձեռնամարտի են բռնվել սիրիական խնդրի քննարկման ժամանակ: Ինչպես տեղեկացնում է «CNNTurk» լրատվական ծառայությունը, ընդդիմադիր «Ժողովրդահանրապետական կուսակցության» (ԺՀԿ-CHP) պատգամավոր Ումիթ Օզգյումուշը խորհրդարանի ամբիոնից հայտարարել է, որ Թուրքիան փաստացիորեն ներգրավված Սիրիայի պատերազմում:

«Ինչպես առաջ ասում էին, թե Իրաքում զանգվածային ոչնչացման զենք կա ու պարզվեց, որ սուտ էր, այնպես էլ հիմա հայտարարում են, թե Սիրիայի իշխանությունները կոտորում են ժողովրդին: Դա ևս սուտ է, իսկ Թուրքիան այդ ստի հիման վրա ռազմավարություն է  կառուցել ու անցել գործողությունների»,- դժգոհել է Օզգյումուշը: Այդ ժամանակ նրա ելույթին միջամտել է Թուրքիայում իշխող «Արդարություն և զարգացում կուսակցության» (ԱԶԿ-AKP) պատգամավոր Մեհմեթ Մեթիները, ով հանդիմանել է ընդդիմադիր պատգամավորին ժողովրդին կոտորողներին սատարելու համար:

Սա խիստ զայրացրել է Օզգյումուշին և պատգամավորները սկսել են վիրավորական խոսքեր ասել իրար, մոտեցել են ու փորձել բռունցքներով շարունակել վեճը: Գործընկերների միջամտությամբ ձեռնամարտը դադարեցվել է: Խորհրդարանական քննարկումը հետաձգվել է մեկ ժամով:

Լրատվամիջոցը ներկայացրել է իշխանական և ընդդիմադիր վերոնշյալ պատգամավորների վիճաբանության սղագրությունը:

Մեհմեթ Մեթիներ – Ամոթ, ամոթ: Դուք չեք կարող սատարել այդ ջարդերը:

Ումիթ Օզգյումուշ – Լռիր: Զավզակություն մի արա: Սուս նստիր տեղդ:

Մեհմեթ Մեթիներ – Մի սատարեք այդ կոտորածները:

Ումիթ Օզգյումուշ – Ասել եմ ու կասեմ. մենք իրողություններն ենք ասում:

Մեհմեթ Մեթիներ – Ամոթ:

Ումիթ Օզգյումուշ – Քեզ ամոթ, քեզ:

Մեհմեթ Մեթիներ – Բա լավ ով է կոտորում այդ ժողովրդին:

Ումիթ Օզգյումուշ – Զավզակություն մի արա ասում եմ:

Մեհմեթ Մեթիներ – Սա Սիրիայի խորհրդարանը չէ, ամոթ է:

Ումիթ Օզգյումուշ – Թե կուզես, հետո դրսում կխոսենք, տեղիցդ մի խոսիր:

Մեհմեթ Մեթիներ – Ախր դատարկ բաներ ես ասում:

Ումիթ Օզգյումուշ – Հալովդ մնա: Ծաղրածու:

Մեհմեթ Մեթիներ –Ծաղրածուն էլ ես դու, ջարդարարն էլ:

Ումիթ Օզգյումուշ – Տո արի ասեմ է:

Մեհմեթ Մեթիներ – Գամ:

Ումիթ Օզգյումուշ – Արի:

Մեհմեթ Մեթիներ – Դու արի:

Ումիթ Օզգյումուշ – Վերջդ տալու եմ... (հայհոյանք)

Մեհմեթ Մեթիներ – (հայհոյանք)

Ermenihaber.am