Թուրքիայում հնարավոր ահաբեկչության վտանգի պատճառով փակվել են Գերմանիայի բոլոր ներկայացուցչություններ

Միջազգային07:14, 15 Սեպտեմբեր 2016

Թուրքիայում հնարավոր ահաբեկչության վտանգի պատճառով փակվել են Գերմանիայի բոլոր ներկայացուցչություններ

Թուրքիայում Գերմանիայի դեսպանատունն ու բոլոր դիվանագիտական ներկայացուցչությունները փակվել են: Թուրքական «Milliyet» թերթի կայքի տեղեկացմամբ՝ գերմանական կողմը մեկնաբանել է, որ պատճառն Անկարայում Գերմանիայի դեսպանատանը սպառնացող առաջիկա ահաբեկչական գործողությունների վտանգն է:

Գերմանիայի արտգործնախարարությանը հղում կատարող աղբյուրը տեղեկացնում է, որ Թուրքիայում Գերմանիայի դիվանագիտական առաքելություններն ու գերմանական դպրոցները փակ կլինեն մինչև սեպտեմբերի 16-ը:

Գերմանիայի դեսպանատան թվիթերյան պաշտոնական էջում ևս նմանատիպ բովանդակությամբ հայտարարություն է հրապարակվել:

Ըստ գերմանական կողմի՝ սա կանխարգելիչ միջոցառում է, որն ուղղված է դիվանագիտական ներկայացուցչությունների աշխատակիցների, աշակերտների և ուսուցիչների անվտանգության ապահովմանը: Սակայն նշվում է նաև, որ հնարավոր ահաբեկչական գործողությունների մասին որևէ այլ տեղեկատվություն չկա:

Հիշեցնենք, որ Թուրքիան վերջին շրջանում պարբերաբար ահաբեկչական հարձակումների թիրախ է դառնում: Վերջին անգամ սեպտեմբերի 12-ին պայթուցիկ նյութերով բեռնված մեքենա էր պայթեցվել Վանում, ինչի հետևանքով 50 մարդ էր վիրավորվել: Իշխանությունները այդ գործողության համար մեղադրում են «Քուրդիստանի բանվորական կուսակցությանը» (ՔԲԿ-PKK), որը Թուրքիայում ահաբեկչական խմբավորում է համարվում:

Աղբյուր` Ermenihaber.am