ERMENI HABER AJANSI

Թուքրական մամուլում շարունակում է ակտիվորեն քննարկվել Թուրքիայի կողմից ահաբեկչական ճանաչված «Քուրդիստանի բանվորական կուսակցության» (ՔԲԿ-PKK) զինաթափման և ինքնալուծարման գործընթացի մանրամասները: 

Հիմնվելով «անվտանգային աղբյուրներից» ստացված տեղեկությունների վրա՝ նշվում է, որ «ՔԲԿ»-ի զենքերը վայր դնելու և ինքնալուծարվելու գործընթացն իրականացվելու է 5 փուլային ծրագրով: 

Առաջին փուլը մեկնարկել է Թուրքիայի նախագահ Ռեջեփ Թայիփ Էրդողանի «Ուժեղացնենք ներքին ճակատը» հայտարարությամբ և ավարտվել «Ազգայնական շարժում կուսակցության» (ԱՇԿ-MHP) ղեկավար Դևլեթ Բահչելիի կողմից «ՔԲԿ»-ի հիմնադիր-առաջնորդ Աբդուլլահ Օջալանին ուղղված կոչով:

Երկրորդ փուլը մեկնարկել է Իմրալը կղզու կալանավայրից Օջալանի ուղարկած, ապա միջնորդավորված կերպով «Ժողովուրդների հավասարություն և ժողովրդավարություն կուսակցության» (DEM) կողմից փետրվարի 27-ին ընթերցված կոչով և ավարտվել ՔԲԿ-ի 12-րդ կոնգրեսում ընդունված ինքնալուծարման որոշումով: 

Երրորդ փուլի մեկնարկ համարվում է վերոհիշյալ կոնգրեսի որոշմանը տրամաբանական կերպով հաջորդող զենքերը վայր դնելու գործընթացը: 

Ընդգծվում է, որ Թուրքիայում, Իրաքում, Սիրիայում և Իրանում գտնվող «ահաբեկիչների» կողմից զենքերը հանձնելու հարցում տարբեր մեխանիզմներ են կիրառվելու: 

Համարվում է որ 4 երկրում ընդհանուր առմամբ 8-ից 10 հազար «ահաբեկիչ» կա:

Այսպիսով, Իրաքի կառավարության հետ ունեցած շփումների արդյունքում հստակեցվել է, որ Քանդիլի, Մեթինայի և Զափի շրջանները պետք է լքվեն, իսկ զենքերը հանձնվեն: 

Սիրիայում էլ նախատեսվում է գործարկվել նախկին նախագահ Բաշար ալ-Ասադի և Թուրքիայի կողմից ՔԲԿ-ի հետ նույնացվող «Սիրիայի քրդական ինքնապաշտպանական ուժերի» (YPG) միջև կնքված 8 կետանոց համաձայնագիրը: Ըստ այդմ՝ «YPG»-ի զինյալները պետք է զենքերը վայր դնեն և անցնեն ծառայության Սիրիայի բանակում: 

Շեշտվում է, որ ոչ մի պարագայում չի դիտարկվում «YPG»-ի պահպանումը որպես զինված կառույց, ինչպես նաև պահանջվող ինքնավարության տրամադրումը:  Նախատեսվում է այս գործընթացում սերտորեն համագործակցել Սիրիայի ժամանակավոր կառավարության հետ: 

Երրորդ փուլում Իրանի մասով իրականացվող գործընթացների մասին, սակայն, մանրամասներ չեն նշվում: Ասվում է միայն, որ Իրանն աջակցում է տարածաշրջանում ընթացող զտումների գործընթացին: 

Զենքերը վայր դնելու տեսանկյունից Թուրքիայում նախատեսված են թուրքական զինված ուժերի և հետախուզական ստորաբաժանումների համակագրված աշխատանքներ:

Ենթադրվում է, որ Թուրքիայում այժմ ՔԲԿ-ականների թիվը տատանվում է 50-ից 100-ի միջև:

Նշվում է նաև, թե ինչ է սպասվում «ՔԲԿ»-ի բարձրաստիճան պաշտոնյաներին: Ըստ այդմ՝ 30-50 մարդուց բաղկացած բարձրաստիճան ղեկավար կազմը կարող է մնալ Իրաքում և կամ տեղափոխվել Եվրոպա: 

Ընդգծվում է, որ ամբողջ գործընթացը պետք է ավարտվի շուրջ 4 ամսում, իսկ զենքերը վայր դնելու ընթացքն ուղղորդվելու է Թուրքիայի «Ազգային հետախուզության ծառայության» (MİT) կողմից, որը նաև համապատասխան զեկույց է ներկայացնելու անձամբ Էրդողանին: 

Երրորդ փուլի ավարտից հետո մեկնարկելու է «ժողովրդավարացման և օրինական կարգավորումների» փուլը, որն էլ հենց համարվում է 4-րդ փուլ: Այս փուլն իրականացվելու է Թուրքիայի խորհրդարանի կողմից: 

Որպես 5-րդ փուլ համարվում է «Սոցիալական և հոգեբանական ինտեգրումը»: Ընդգծվում է, որ 5-րդ փուլը երկար գործընթաց է ենթադրում և այն կարող է թիրախավորվել մի շարք «սադրիչ» գործողություններով: 

Հիշեցնենք, որ մայիսի 5-ից 7-ն էր գումարվել «ՔԲԿ»-ի 12-րդ կոնգրեսը, որում էլ ընդունվել էին զենքերը վայր դնելու և ինքնալուծարման որոշումները։