ERMENI HABER AJANSI

ՌԴ նախագահ Վլադիմիր Պուտինի՝ Թուրքիա կատարելիք այցի նախապատրաստական ​​աշխատանքները շարունակվում են։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը։

«Հուսով ենք, որ այցը տեղի կունենա այն բանից հետո, երբ կավարտվեն դրա նախապատրաստական ​​աշխատանքները: Դրանք վաղուց են ընթանում։ Մենք, որպես կանոն, չենք բացահայտում մեր նախագահի այցերի նախապատրաստման բոլոր մանրամասները, դրանք փակ բնույթ են կրում։ Հիմա նույնպես չենք անելու»,- ընդգծել է Պեսկովը:

Հավելենք, որ Middle East Eye-ի հաղորդմամբ՝ Թուրքիա Պուտինի այցի ձգձգումների պատճառը նրա առաջ քաշած պահանջներն են։ ՌԴ նախագահը մասնավորապես ցանկանում է Թուրքիա մեկնել ռուսական կործանիչների ուղեկցությամբ, ըստ աղբյուրների՝ հավանաբար, դա կապված է թռիչքի ընթացքում ինքնաթիռներ խոցելու՝ Ուկրաինայի օդուժի կարողության հետ։

Մյուս պահանջը Պուտինի կացության հարցն է։ Անկարայում գործող Hilton, Sheraton և JW Marriott հյուրանոցները, պատկանում են ամերիկյան ընկերություններին, ինչն անհանգստություն է առաջացնում Ռուսաստանի իշխանությունների մոտ։ Մոսկվան մտավախություն ունի, որ հյուրանոցների այս ցանցերը կարող են բավարար անվտանգություն չապահովել ՌԴ նախագահի համար, հատկապես Ռուսաստանի և ԱՄՆ-ի միջև լարված հարաբերությունների ներքո:

Ըստ աղբյուրի՝ այս պայմաններում հնարավոր է, որ Պուտինին տեղավորեն հատուկ հյուրատանը, որի պրակտիկան չի կիրառվում նման այցերի ժամանակ։