Օզելը մեղադրել է Էրդողանին Քոբանիի դատավարությունը քաղաքականացնելու մեջ

Իրավական12:41, 17 Մայիս 2024

Օզելը մեղադրել է Էրդողանին Քոբանիի դատավարությունը քաղաքականացնելու մեջ

Թուրքիայի գլխավոր ընդդիմադիր ուժը համարվող քեմալական «Ժողովրդահանրապետական կուսակցության» (ԺՀԿ-CHP) նախագահ Օզգյուր Օզելն անդրադարձել է հանրությանը «Քոբանիի դատավարություն» անունով հայտնի դատական գործի շրջանակներում ընդունված վերջին որոշումներին:

Օզելը «Sözcü TV»-ի ուղիղ եթերում խոսելիս՝ ընդգծել է, որ նշված դատական գործում արդարություն գոյություն չունի:

«Գործը քաղաքական դատական գործ է: Եթե մի գործ բացվել է դեպքը լինելուց 5 տարի հետո, մեղադրականն էլ ուղղակիորեն տարիներով գրվել է մի կուսակցության ղեկավարի կողմից, ուրեմն դա քաղաքական դատական գործ է:

Ձգձգումներով, երկարացումներով ու նման բաներ անելն այն մասին են, որ դա բոլոր ուղղություններով քաղաքականության տեսանկյունից օգտագործվող հարմար դատավարություն է:

Ով ինչ ուզում է թող ասի, բայց այս դատական գործում ոչ մի արդարություն չկա»:

Ու՞մ են ուղված եղել Օզելի խոսքերը

Չնայած վերջերս Թուրքիայում իշխող «Արդարություն և զարգացում կուսակցության» (AKP-ԱԶԿ) առաջնորդ և երկրի նախագահ Ռեջեփ Թայիփ Էրդողանի ու Օզելի միջև տեղի ունեցած հանդիպումից հետո նրանց միջև ենթադրվող մերձեցմանը, որը նաև վերագրվել էր ԱԶԿ-ԺՀԿ մերձեցման միտումների, այսօր, կարծես, իշխող և գլխավոր ընդդիմադիր ուժը համարվող կուսակցությունների միջև իրավիճակը կրկին սրվում է՝ ընդդիմադիր կուսակցական և քաղաքական գործիչներին ազատազրկման դատապարտելու մասին որոշումների ֆոնին:

Ըստ էության՝ Օզելը «մեկ կուսակցության» ղեկավար ասելիս՝ նկատի է ունեցել Էրդողանին և ակնարկել, որ նման որոշումներն իր համար անընդունելի են:

Հիշեցնենք, որ մայիսի 16-ին՝ «Քոբանիի դատավարության» շրջանակներում կայացած 83-րդ դատական լսումների ժամանակ էր կայացվել՝ «Ժողովրդադեմոկրատական կուսակցության» (HDP-ԺԴԿ) նախկին համանախագահ Սալահաթթին Դեմիրթաշին տարբեր հանձագործությունների համար 42 տարով, նախկին ԺԴԿ-ական Ֆիգեն Յուքսեքդաղին՝ 32 տարի 8 ամիս ժամկետով, իսկ Մարդինի քաղաքապետ Ահմեդ Թուրքին՝ 10 տարի ժամկետով դատապարտելու մասին որոշումը:

Աղբյուր` diken.com.tr