Էրդողանը ստորագրել է ՆԱՏՕ-ին Շվեդիայի անդամակցության արձանագրությունը վավերացնող օրենքը

Քաղաքական12:25, 26 Հունվար 2024

Էրդողանը ստորագրել է ՆԱՏՕ-ին Շվեդիայի անդամակցության արձանագրությունը վավերացնող օրենքը

Թուրքիայի նախագահ Ռեջեփ Թայիփ Էրդողանը ստորագրել է ՆԱՏՕ-ին Շվեդիայի անդամակցության արձանագրությունը վավերացնելու մասին խորհրդարանի ընդունած օրենքը:

Թուրքիան այսպիսով դարձել է ՆԱՏՕ-ի նախավերջին երկիրը, որը հաստատել է Շվեդիայի անդամակցությունը: Նշվում է, որ այս պահին Շվեդիայի անդամակցությունը չվավերացրած միակ երկիրը մնում է Հունգարիան:

Ըստ թուրքական մամուլի՝ Շվեդիայի վարչապետ Ուլֆ Քրիստերսոնը Հունգարիայի վարչապետ Վիկտոր Օրբանին առաջարկել է ՆԱՏՕ-ին Շվեդիայի անդամակցելու հայտը և երկկողմ այլ հարցեր քննարկելու համար հանդիպել հաջորդ շաբաթ Բրյուսելում։

Հարցին արձագանքել է ԱՄՆ պետքարտուղար Էնթոնի Բլինքենը` նշելով, որ ԱՄՆ-ն գոհունակություն է հայտնում Էրդողանի կայացրած որոշման վերաբերյալ։

Հիշեցնենք, որ Թուրքիայի խորհրդարանում հունվարի 23-ին քվերակության է դրվել Հյուսիսատլանտյան դաշինքին (ՆԱՏՕ) Շվեդիայի անդամակցության վերաբերյալ օրենքի նախագիծը:

Քվեարկության արդյունքում 346 պատգամավորներից 287-ի կողմ, 55-ի դեմ և 4-ի ձեռնպահ ձայնով այն ընդունվել է:

Աղբյուր` TRT haber.com