ՆԱՏՕ-ին Շվեդիայի անդամակցության արձանագրությունները կմտնեն Թուրքիայի խորհրդարան

Քաղաքական10:46, 11 Հուլիս 2023

ՆԱՏՕ-ին Շվեդիայի անդամակցության արձանագրությունները կմտնեն Թուրքիայի խորհրդարան

Հուլիսի 10-ին Լիտվայի մայրաքաղաք Վիլնյուսում Հյուսիսատլանտյան դաշինքի (ՆԱՏՕ) անդամ երկրների գագաթնաժողովի շրջանակներում եռակողմ հանդիպում է տեղի ունեցել Թուրքիայի նախագահ Ռեջեփ Թայիփ Էրդողանի, ՆԱՏՕ-ի գլխավոր քարտուղար Յենս Ստոլտենբերգի և Շվեդիայի վարչապետ Ուլֆ Քրիսթերսոնի միջև:

Հանդիպման արդյունքների մասին գրավոր հայտարարություն է տարածվել դաշինքի պաշտոնական կայքում:

Ընգծվել է, որ 2022թ․ եռակողմ հուշագրի բոլոր քայլերի շրջանակում Շվեդիան վերափոխել է իր սահմանադրությունը, փոփոխել է օրենքները, ընդլայնել է Թուրքիայում ահաբեկչական համարվող «Քուրդիստանի բանվորական կուսակցության» (ՔԲԿ) դեմ պայքարում համագործակցությունը և սկսել զենք արտահանել Թուրքիա։

Նշվել է, որ Թուրքիան և Շվեդիան համաձայնություն են տվել 2022-ին Իսպանիայի մայրաքաղաք Մադրիդում կայացած ՆԱՏՕ-ի գագաթնաժողովում ստեղծված եռակողմ մշտական համատեղ մեխանիզմին. նախարարների մակարդակով տարին մեկ անգամ հանդիպել և շարունակել համագործակցությունը։

Շվեդիան ակտիվ աջակցելու է ԵՄ-ին Թուրքիայի անդամակցության գործընթացի ակտիվացման ջանքերին՝ ներառյալ Թուրքիա-ԵՄ մաքսային միության արդիականացումը և վիզայի ազատականացումը։

Այսպես, վերոհիշյալ հիմքերով և եվրոպաատլանտյան տարածաշրջանի զսպման և պաշտպանության անհրաժեշտությունների համատեքստում Թուրքիան Շվեդիայի անդամակցության արձանագրությունները կփոխանցի Թուրքիայի խորհրդարան և սերտ կհամագործակցի խորհրդարանի հետ դրանց վավերացումն ապահովելու համար։

Հիշեցնենք, որ Էրդողանը հուլիսի 10-ին նախքան Վիլնյուս մեկնելն Աթաթուրքի անվան օդանավակայանից մամլո ասուլիս էր տվել: Նա կոչ էր արել բոլոր երկրներին, որոնք Թուրքիային 50 տարի է, ինչ սպասեցնում ԵՄ-ի դռների մոտ, բացել դրանք, որից հետո էլ ինքը ճանապարհ կհարթի Շվեդիայի համար դեպի ՆԱՏՕ այնպես, ինչպես դա արվեց Ֆինլանդիայի համար:

Աղբյուր` Trthaber.com