Քըլըչդարօղլուն՝ ԺՀԿ համագումարում կուսակցության առաջնորդի թեկնածու

Քաղաքական16:58, 16 Հունիս 2023

Քըլըչդարօղլուն՝ ԺՀԿ համագումարում կուսակցության առաջնորդի թեկնածու

Հունիսի 16-ին Թուրքիայում քեմալական և գլխավոր ընդդիմադիր ուժ համարվող «Ժողովրդահանրապետական» կուսակցության (ԺՀԿ) փոխնախագահ Բյուլենթ Ուշօղլուն անդրադարձել է առաջիկայում գումարվելիք համագումարում կուսակցության առաջնորդի հնարավոր փոփոխության մասին շրջանառվող լուրերին:

Ուշօղլուն տեղեկացրել է, որ ինքը, ինչպես նաև այլ ԺՀԿ-ականներ համագումարում սատարելու են ընդդիմադիր ուժի ներկայիս նախագահ Քեմալ Քըլըչդարօղլուի թեկնածությունը:

Նրա խոսքերով, Ստամբուլի քաղաքապետ Էքրեմ Իմամօղլուն և 2015-ին կուսակցության փոխնախագահի պաշտոնը զբաղեցրած Օզգուր Օզելը, ով ևս իրեն համարում է կուսակցության առաջնորդի թեկնածու, պետք է «ավելի ուշադիր լինեն» ներկայիս ԺՀԿ առաջնորդի նկատմամբ:

«Իմամօղլուն հեշտությա՞մբ կարող է դառնալ կուսակցության առաջնորդ: Չի կարող, խնդիր ունի»,-ասել է ԺՀԿ փոխնախագահը:

Նշենք որ, ԺՀԿ ներսում համապետական ընտրություններից հետո տարաձայնություններ էին սկսվել:

Մասնավորապես ԺՀԿ կուսակցության մի շարք անդամներ, այդ թվում կուսակցության կենտրոնական խորհդրի անդամները լքել էին կուսակցությունը՝ համապետական ընտրություններում հաջողություն չգրանցելու պատճառով:

Կուսակցության առաջնորդ Քըլըչդարօղլուն, ով նաև ընտրություններում ընդդիմադիր «Ազգ» դաշինքի միասնական թեկնածուն էր, վերոհիշյալ իրդադարձություններից հետո հայտարարել էր կուսակցության ղեկավարի պաշտոնում մնալու և պայքարը շարունակելու մասին:

Զուգահեռաբար Իմամօղլուն ընտրությունների արդյուքններից դժգոհ մնալով սկսել էր խոսել կուսակցության նախագահի պաշտոնը զբաղեցնելու իր ցանկության մասին:

Այս և նմանատիպ այլ հարցերի շուրջ քննարկումներ ունենալու նպատակով Քըլըչդարօղլուն և Իմամօղլուն 3 հանդիպում էին անցկացրել:

Հիշեցնենք, որ Թուրքիայում համապետական ընտրությունները տեղի էին ունեցել մայիսի 14-ին, իսկ նախագահական ընտրությունների երկրորդ փուլը մայիսի 28-ին, որի արդյունքում շուրջ 5% ձայների առավելությամբ Էրդողանը վերընտրվել էր նախագահի պաշտոնում, իսկ Քըլըչդարօղլուի պարտությունը դժգոհություն առաջացրել ընդդիմության շրջանում:

Աղբյուր` diken