Էրդողանը վերընտրվել է Թուրքիայի նախագահ

Քաղաքական09:01, 29 Մայիս 2023

Էրդողանը վերընտրվել է Թուրքիայի նախագահ

Թուրքիայում նախագահական ընտրությունների 2-րդ փուլի քվեների հաշվման գործընթացը մայիսի 29-ի, Երևանի ժամանակով 08:30-ի դրությամբ շարունակվում է։

Սակայն երկրի բարձրագույն ընտրական հանձնաժողովի նախագահ Ահմեդ Յեները մայիսի 28-ի երեկոյան բացված քվեատուփերի 99.32%-ի համաձայն ընտրությունների վերջնաարդյունքը համարելով արդեն իսկ անփոփոխելի, հայտարարել է Թուրքիայի նախագահ, իշխող «Արդարություն և զարգացում» (ԱԶԿ-AKP) կուսակցության առաջնորդ և «Ժողովուրդ» դաշինքի միասնական թեկնածու Ռեջեփ Թայիփ Էրդողանի վերընտրման մասին:

Ըստ այդմ՝ Էրդողանը հավաքել է ձայների 51.91%-ը, իսկ քեմալական, գլխավոր ընդդիմադիր ուժ համարվող «Ժողովրդահանրապետական» կուսակցության (ԺՀԿ-CHP) առաջնորդ և «Ազգ» դաշինքի միասնական թեկնածու Քեմալ Քըլըչդարօղլուն՝ 48.09%-ը:

Թուրքիայում նախագահական ընտրությունների 2-րդ փուլին մասնակցել է ընտրելու իրավունք ունեցող 60.771.236 թուրք քաղաքացիների 85.71%-ը: Իսկ ընդհանուր 52.089.286 քվեից վավեր է ճանաչվել 51.414.604-ը:

Հիշեցնենք, որ Թուրքիայում մայիսի 14-ին կայացել էր նախագահական ընտրությունների առաջին փուլը, որի ընթացքում առաջադրված թեկնածուներից և ոչ մեկի 50%+1 ձայն չհավաքելու հետևանքով ընտրությունները տեղափոխվել էին 2-րդ փուլ, որն էլ տեղի ունեցավ մայիսի 28-ին:

Աղբյուր` Trthaber.com