Թուրք լրագրողը ներողություն է խնդրել պոլսահայ տնտեսագետ Տարոն Աճեմօղլուից

Հասարակական11:41, 06 Դեկտեմբեր 2022

Թուրք լրագրողը ներողություն է խնդրել պոլսահայ տնտեսագետ Տարոն Աճեմօղլուից

Թուրքական իշխանամերձ «Türkiye» թերթի լրագրող Նեջմեթթին Բաթըրելը ներողություն է խնդրել ամերիկաբնակ պոլսահայ տնտեսագետ Տարոն Աճեմօղլուից, ինչպես նաև Թուրքիայում գլխավոր ընդդիմադիր «Ժողովրդահանրապետական» կուսակցությունից (ԺՀԿ-CHP) և ջնջել է իր թվիթը նրանց մասին։

Բաթըրելը, Twitter-ում թիրախավորել էր Աճեմօղլուին այն բանից հետո, երբ վերջինս տեսակապով ելույթ էր ունեցել ընդդիմադիր կուսակցության կազմակերպած միջոցառման ժամանակ: Թուրք լրագրողը անդրադառնալով միջոցառման ժամանակ ԺՀԿ-ի ներկայացրած նոր տեսլականին, գրել էր․ «Քըլըչդարօղլուի (ԺՀԿ առաջնորդ-թարգմ․) նոր տեսլականի փաստաթուղթը պատրաստել է Ֆեթուլահական ահաբեկչական կազմակերպության (FETÖ) գովասանքին արժանացած հայ Տարոն Աճեմօղլուն, արյունը քաշել է»։

Գրառումը բացասական արձագանք էր գտել թվիթերի թուրք օգտատերերի շրջանում՝ մեկնաբանվելով որպես ռասիստական։

Տնտեսագետ, գրող, պրոֆ․ Օզգյուր Դեմիրթաշը, շեշտելով, որ Աճեմօղլուն Թուրքիայի Հանրապետության քաղաքացի է, նշել էր, որ Բաթըրելը «չի կարող լինել Տարոնի կոշիկի կապը անգամ»։

Որոշ օգտատերեր հարցրել էին, «թե արդյոք Մարգար Եսայանին պատգամավոր, իսկ Էթյեն Մահչուփյանին գլխավոր խորհրդական դարձրած Էրդողանի արյունը նույնպես քաշել էր», և ինչու Բաթըրելը նրանց համար ևս նման բան չէր ասել։

Եղել էին նաև դիտարկումներ, որ ռասիզմ կա ոչ միայն Աճեմօղլուի հայ լինելու շեշտադրման մեջ, այլև այն բանում, որ Բաթըրելը, «արյունը քաշել է» ասելով, նկատի է ունեցել Քըլըչդարօղլուի դերսիմյան (ալևիական) ծագումը և այլն։

Թվիթը ջնջելով և ներողություն խնդրելով՝Բաթըրելը գրել է, որ այն սխալ մեկնաբանության տեղիք է տվել, շեշտել, որ ինքը չի կարող ռասիստական մոտեցում ունենալ հայ համայնքի նկատմամբ։

Նշենք, որ Աճեմօղլուն թուրքական մերձիշխանական որակվող ԶԼՄ-ների թիրախում է այն բանից հետո, երբ դեկտեմբերի 3-ին տեսակապով ելույթ է ունեցել ԺՀԿ-ի միջոցառմանը, որի ընթացքում ներկայացվել է ընդդիմադիր կուսակցության նոր տեսլականը՝ այդ թվում Թուրքիայի տնտեսական զարգացման մասին։

Աղբյուր` Diken

Այս ենթաբաժնի վերջին նորությունները

17:39, 24 մարտ

Քըլըչդարօղլուն առաջ է անցնում Էրդողանից

Թուրքական մի շարք վիճակագրական-հետազոտական ընկերություններ գալիք նախագահական և խորհրդարանական ընտրությունների վերաբերյալ շարունակում են հարցումներ անցկացնել։

17:08, 24 մարտ

«Երևանը պատմական քաղաք է». թուրք ֆոտոթղթակիցը Հայաստանում է

Այսինքն, քաղաքում այդքան էլ ֆուտբոլային խաղի տրամադրություն չկա։ Հուսով եմ, մեր ազգային հավաքականը մեծ ոգևորությամբ կպայքարի Հայաստանի դեմ և գեղեցիկ հաղթանակ կտանի: