Թուրքիայում խորանում են հակառուսական և հակապուտինյան տրամադրությունները

Հասարակական15:29, 14 Ապրիլ 2022

Թուրքիայում խորանում են հակառուսական և հակապուտինյան տրամադրությունները

Թուրքիայում հասարակությունը երկրի շահերի տեսանկյունից ԱՄՆ-ին համարում է ամենամեծ սպառնալիք, այնուհետև՝ Ռուսաստանին։ Ընդ որում՝ եթե նախորդ տարի ԱՄՆ-ին սպառնալիք համարողները կազմում էին 60․6 տոկոս, ապա այս տարի՝ 58․3։ Ռուսաստանի դեպքում այդ համամասնությունն աճել է՝ 19-ից բարձրանալով 31 տոկոսի։ Այս տվյալները, թուրք լրագրող Մուրադ Սաբունջուի փոխանցմամբ, տեղ են գտել «Մարշալ» հիմնադրամի վերջին հետազոտության մեջ։

Ռուս-ուկրաինական ռազմական ճգնաժամի մեկնարկից հետո կատարված հետազոտության համաձայն՝ թուրքական հանրության շրջանում օտար երկրների նկատմամբ դրական պատկերացումների առումով Ռուսաստանն ամենաշատն է տուժել։ Այդ երկրի նկատմամբ այժմ դրական կարծիք ունի հանրության միայն 5․6 տոկոսը՝ նախորդ տարվա 11․3-ի փոխարեն, ավելին՝ հարցվածների միայն 4․9 տոկոսը դրական մտքեր ունի Ռուսաստանի նախագահ Վլադիմիր Պուտինի նկատմամբ։

Հետազոտության մասնակիցների 33 տոկոսի կարծիքով՝ Թուրքիան ամենասերտը պետք է համագործակցի ԵՄ երկրների հետ, ընդ որում՝ այդ համամասնությունը երիտասարդության շրջանում հասնում է 44 տոկոսի։ Հասարակության միայն 5․6 տոկոսն է գտնում, սակայն, որ Թուրքիան պետք է ամենասերտը գործակցի Ռուսաստանի հետ։

Մարշալ հիմնադրամի Անկարայի գրասենյակի տնօրեն Օզգյուր Ունլյուհիսարջըքլի խոսքով՝ Ռուսաստանի վարկանշի անկմանը զուգահեռ թուրքական հասարակությունում հետաքրքիր մոտեցում կա ռուս-ուկրաինական ճգնաժամի պայմաններում Թուրքիայի միջնորդական քաղաքականության հարցում։ Մասնավորապես, հետազոտության մասնակիցների 43․7 տոկոսը կարծում է, որ Թուրքիան հաշտեցնող դեր պետք է խաղա Ռուսաստանի և Ուկրաինայի միջև, մինչդեռ 40․1 տոկոսի կարծիքով՝ Թուրքիան պետք է այդ հակամարտությունից հեռու մնա։

Աղբյուր` T24.com.tr

Այս ենթաբաժնի վերջին նորությունները

17:38, 08 մայ

Թուրքիայում սոցցանցի ավելի քան 27.000 հաշիվ է արգելափակվել․

Արգելափակումների հիմնական պատճառները եղել են հասարակական կարգը խախտող, ահաբեկչություն քարոզող կամ տարածող, ինչպես նաև ատելության խոսք պարունակող գրառումները։