Էրդողան. «Քրդական հարց գոյություն չունի, մենք այն լուծել ենք»

Քաղաքական13:05, 24 Սեպտեմբեր 2021

Էրդողան. «Քրդական հարց գոյություն չունի, մենք այն լուծել ենք»

Թուրքիայի նախագահ Ռեջեփ Թայիփ Էրդողանը Նյու Յորքից, որտեղ մասնակցում էր ՄԱԿ-ի Գլխավոր ասամբլեայի 76-րդ նստաշրջանին, Թուրքիա վերադարձի ճանապարհին հարցազրույց է տվել թուրք լրագրողներին:

Էրդողանը պատասխանել է Թուրքիայի առաջնային օրակարգի մի շարք խնդիրներին առնչվող հարցերի: Նա նաև անդրադարձել է քրդական հարցին, որի շուրջ քննարկումները վերջին շրջանում ակտիվացել են թուրքական ներքին խոսույթում:

Էրդողանը նշել է, որ Թուրքիայում այդ հարցի միակ լուծումը «Ժողովուրդ» դաշինքն է, որը կազմել են իր գլխավորած «Արդարություն և զարգացում» և «Ազգայնական շարժում» կուսակցությունները:

Ըստ Թուրքիայի նախագահի՝ իրենց դաշինքի ուղին կառուցված է միության, միասնականության և եղբայրության սկզբունքների հիման վրա: Հետևաբար, Թուրքիայում քրդական հարց չկա, քանի որ իրենք այդ հարցը լուծել, հաղթահարել են:

«Եթե միության, միասնականությանը և եղբայրությանը հավատացողներ կան, խնդրեմ, թող գան, և միասին շարունակենք ճանապարհը»,- նշել է Էրդողանը:

Հիշեցնենք, որ այս թեման ակտուալ է դարձել այն բանից հետո, երբ գլխավոր ընդդիմադիր «Ժողովրդահանրապետական կուսակցության» (CHP-ԺՀԿ) նախագահ Քեմալ Քըլըչդարօղլուն հայտարարել է, որ քրդական հարցը լուծելու համար լեգիտիմ ուժ է անհրաժեշտ: Ըստ քեմալականների առաջնորդի՝ նման լեգիտիմ ուժ կարող է համարվել քրդամետ «Ժողովուրդների դեմոկրատական կուսակցությունը» (HDP-ԺԴԿ):

Քըլըչդարօղլուին արձագանքել էին հայտնի քաղաքական գործիչներ: ԺԴԿ-ի նախկին համանախագահ Սեզայի Թեմելին ընդգծել էր, որ քրդական հարցի լուծման հասցեն Իմրալի կղզին է՝ ակնարկելով քրդերի առաջնորդ Աբդուլլահ Օջալանին, որը ցմահ բանտարկված է այդ կղզում:

Թուրքիայի աջ ծայրահեղական «Ազգայնական շարժում կուսակցության» (MHP-ԱՇԿ) նախագահ Դևլեթ Բահչելին քրդական հարցի գոյության մասին խոսողներին ստոր վախկոտներ էր անվանել՝ նշելով, որ նրանց սիրտը թուրք ազգի սրտի հետ համահունչ չի բաբախում: Նա նաև քննադատել էր քեմալական կուսակցությանը և նրա ղեկավար Քըլըչդարօղլուին՝ նշելով, որ այդ կուսակցությունը վերածվում է ազգային անվտանգության սպառնալիքի:

Աղբյուր` Ermenihaber.am

Այս ենթաբաժնի վերջին նորությունները

17:00, 12 օգոս

Ըստ թուրք քաղաքական գործչի՝ հայ-ադրբեջանական համաձայնագիրը հակասում է Թուրքիայի շահերին

Թուրքիայի պահպանողական, իսլամիստական ուղղվածության «Նոր բարօրություն կուսակցության» ղեկավարը հանդես է եկել հայտարարությամբ:

13:15, 12 օգոս

Փայլանը կոչ է արել Էրդողանին բացել Թուրքիայի ու Հայաստանի սահմանը

Պոլսահայ գործիչը անհրաժեշտ է համարել անհապաղ քայլեր ձեռնարկել այդ ուղղությամբ։

10:49, 12 օգոս

Էրդողան. «Ահաբեկչությունից անդարձ ազատվելու համար հնարավորության պատուհան է բացվել»

Թուրքիայի նախագահը կառավարության նիստից հետո հանդես է եկել հայտարարություններով:

Ուղիղ խոսք

Անկարայում հարձակում TUSAŞ-ի վրա․ մանրամասներ և վերլուծություն

ամենաշատ ընթերցված

Իմամօղլուն ողջունել է հայ-ադրբեջանական խաղաղության համաձայնագրի նախաստորագրումը

ԱՄՆ նախագահ Դոնալդ Թրամփի հովանու ներքո օգոստոսի 12-ի երկու երկրների միջև նախաստորագրվել էր խաղաղության և դիվանագիտական հարաբերությունների հաստատման մասին համաձայնագիրը: