ԱՄՆ-ն խստորեն դատապարտել է Էրդողանի հակասեմական հայտարարությունները

Քաղաքական11:01, 19 Մայիս 2021

ԱՄՆ-ն խստորեն դատապարտել է Էրդողանի հակասեմական հայտարարությունները

ԱՄՆ-ն խստորեն դատապարտել է Թուրքիայի նախագահ Ռեջեփ Թայիփ Էրդողանի՝ հրեա ժողովրդին ուղղված հակասեմական հայտարարությունները։ Այս մասին հաղորդագրություն է հրապարակել ԱՄՆ պետքարտուղարության պաշտոնական ներկայացուցիչ Նեդ Փրայսը։

«Մենք հորդորում ենք նախագահ Էրդողանին և Թուրքիայի մյուս ղեկավար անձանց զերծ մնալ սադրիչ հայտարարություններ անելուց, որոնք կարող են ավելի շատ բռնություններ հրահրել»,-նշվում է հայտարարության տեքստում:

Բացի այդ Անկարային կոչ է արվել միանալ Վաշինգտոնի հետ համատեղ աշխատանքին՝ ուղղված իսրայելապաղեստինյան հակամարտության կարգավորմանը։

«Հակասեմական հռետորաբանությունը տեղ չունի ոչ մի տեղ: ԱՄՆ-ն վճռական է տրամադրված հակասեմականության դեմ՝ իր բոլոր դրսևորումներով պայքարի հարցում: Մենք միշտ պետք է ստերը հակադրենք փաստերով և արդարությամբ պատասխանենք ատելության հանցագործություններին»,-ասվում է հայտարարությունում:

Հիշեցնենք, որ մայիսի 17-ին Էրդողանը կոշտ քննադատության էր ենթարկել Ավստրիայի կառավարության որոշումը՝ բարձրացնելու Իսրայելի դրոշը Վիեննայի դաշնային շենքերի վրա։ Դա արվել էր՝ ի նշան Իսրայելի հետ համերաշխության։

Թուրքիայի առաջնորդի խոսքով՝ նման գործողություններով ավստրիական իշխանություններն իրենց նույնականացվում են ահաբեկչության հետ։ Էրդողանը ենթադրել էր, որ նման գործողությամբ Վիեննան «փորձում է ստիպել մուսուլմաններին վճարել իր կողմից իրականացված հրեաների ցեղասպանության համար»:

Էրդողանն այնուհետև զայրույթն ուղղել էր ԱՄՆ-ի նախագահի վրա, ընդ որում շահարկել էր Ջո Բայդենի կողմից Հայոց ցեղասպանությունը ճանաչելու հանգամանքը:

«Պարոն Բայդեն, դուք հայերի կողմն եք բռնում այսպես կոչված Հայոց ցեղասպանության հարցում, և հիմա, դժբախտաբար, Դուք Ձեր արյունոտ ձեռքերով պատմություն եք գրում այս փուլում, երբ Գազայի նկատմամբ ուժի անհամաչափ կիրառում է, որը տանում է հարյուր հազարավոր մարդկանց նահատակության»,- ասել է Էրդողանը:

Աղբյուր` cumhuriyet.com.tr