Թուրքիայի ԱԳՆ-ի պատասխանը Ֆրանսիայի նախագահին

Քաղաքական17:41, 23 Հունիս 2020

Թուրքիայի ԱԳՆ-ի պատասխանը Ֆրանսիայի նախագահին

Թուրքիայի արտգործնախարարությունը պատասխանել է Ֆրանսիայի նախագահ Էմանուել Մակրոնի՝ Լիբիայում Թուրքիայի վարած քաղաքականությունը դատապարտող հայտարարություններին։

Թուրքիայի ԱԳՆ-ի մամուլի խոսնակ Համի Աքսոյը Մակրոնի այն հայտարարությանը, թե Թուրքիան վտանգավոր խաղ է խաղում Լիբիայում, արձագանքել է հետևյալ կերպ։

«ՄԱԿ-ի որոշումների շրջանակում և պահանջների հիման վրա Լիբիայի Ազգային համաձայնության կառավարությանը ցուցաբերված աջակցությունը վտանգավոր խաղ որակելը միայն կարելի է բացատրել բանականության մթագնումով»։

Աքսոյը նշել է, որ եթե Մակրոնը ստուգի իր հիշողությունը և գործի դնի իր ողջամտությունը, ապա կհիշի, որ այսօր Լիբիայում «բոլոր չարիքների պատճառը Ֆրանսիայի աջակցությունը վայելող գեներալ Հաֆթարն է, որը Մոսկվայում և Բեռլինում հրաժարվեց հրադադար հաստատելուց, ինչպես նաև վերջինիս կողմից իրականցվող հարձակումները»։

Թուրքիան Ֆրանսիային մեղադրել է տարիներ շարունակ լիբիական «ոչ լեգիտիմ կառույցներին աջակցություն ցուցաբերելու և Լիբիան քաոսի վերածելու հարցում»։

«Այս տեսանկյունից Լիբիայում հիմնական վտանգավոր դերը խաղում է Ֆրանսիան։ Նախագահ Մակրոնը, որքան էլ փորձի մեր երկրին ուղղված անհիմն մեղադրանքներով կոծկել այս ճշմարտությունը, միևնույն է լիբիական ժողովուրդը երբեք չի մոռանա, թե Ֆրանսիան ինչպիսի վնաս է հասցրել այդ երկրին՝ իր եսասիրական շահերի և իր դաշնակիցների նպատակների համար»,-ասել է Աքսոյը։

Թուրքիան Ֆրանսիայից պահանջել է «սկզբունքային վերաբերմունք» ցուցադրել գեներալ Հաֆթարի և վերջինիս ուժերի կողմից իրականացվող «պատերազմական հանցագործությունների» ուսումնասիրման հարցում, որոնք ուղղված են անմեղ քաղաքացիների և մասնավորպես Թարհունայի գերեզմանատների դեմ։

Թուրքիան Ֆրանսիային հորդորել է, որ «իրեն իրավունք չվերապահի խառնվելու» Արևելյան Միջերկրականի խնդիրներին, քանզի ծովային սահման չունի այդ հատվածում։

«Ֆրանսիայի այն դիրքորոշումը, որն աչքաթող է անում տարածաշրջանում Թուրքիայի օրինական իրավունքները և անվերապահ աջակցություն է ցուցաբերում մաքսիմալիստական հավակնություններին, Արևելյան Միջերկրական ծովում խաղաղության և կայունության պահպանման փոխարեն ավելի է սրում իրավիճակը։ Դժբախտաբար, երկար ժամանակ է ակնհայտ է, որ Ֆրանսիան չի կարողանում կամ էլ ավելի վատ է ասել, որ չի ցանկանում ճիշտ և անաչառ գնահատական տալ Արևելյան Միջերկրականում տեղի ունեցող զարգացումներին»,-նշել է խոսնակը։

Թուրքիայի ԱԳՆ-ն, անդրադառնալով նաև Մակրոնի՝ ՆԱՏՕ-ի ուղեղի մահվան վերաբերյալ հայտարարությանը, հայտնել է, որ այն ծեծված մոտեցում է։

Հիշեցնենք, որ թուրքական ռազմանավը Լիբիայի ափամերձ շրջանում հրաժարվել էր կատարել տեղափոխվող բեռի ստուգման մասին ֆրանսիական ռազմանավի հրահանգը, որը մասնակցում էր ՆԱՏՕ-ի Sea Guardian գործողություններին:

Խուսափելով ստուգումից՝ թուրքական նավը ռադարային համակարգի օգնությամբ նշանառության տակ էր առել ֆրանսիական ռազմանավը, ինչը ֆրանսիական ռազմական գերտեսչությունը դիտարկել էր որպես «թշնամական և ագրեսիվ գործողություն»:

Ֆրանսիայի նախագահ Էմանուել Մակրոնը Լիբիայում Թուրքիայի ապօրինի գործողությունների վերաբերյալ հայտնել էր, որ այդ երկիրը վտանգավոր խաղ է խաղում։

Աղբյուր` ntv.com.tr

Այս ենթաբաժնի վերջին նորությունները

17:23, 30 հուն

Թուրքիայի նախագահը մեկնելու է Լեռնային Ղարաբաղ

Էրդողանը պիտի մասնակցի «Տնտեսական համագործակցության կազմակերպության» (ECO) անդամ երկրների 17-րդ գագաթնաժողովին։

13:02, 30 հուն

Մեծ Բրիտանիայի արտգործնախարարը կմեկնի Թուրքիա

Աղբյուրն ընդգծում է, որ Մեծ Բրիտանիայում բնակվում է մոտ կես միլիոն թուրք։

14:39, 27 հուն

Թուրքիայի առևտրի նախարարը հանդիպել է ՌԴ փոխվարչապետի հետ

Կողմերը քննարկել են առևտրաշրջանառության ծավալը հասցնել 100 մլրդ դոլարի և մտքեր են փոխանակել առաջիկա ժամանակահատվածում իրականացվելիք նախագծերի վերաբերյալ։