Քաղաքական գործիչներից ովքե՞ր են ամենաշատը հիշատակվում թուրքական մամուլում

Հասարակական17:34, 16 Դեկտեմբեր 2019

Քաղաքական գործիչներից ովքե՞ր են ամենաշատը հիշատակվում թուրքական մամուլում

Առանց մարդկային գործոնի, ավտոմատացված կերպով կայքերում բառերի որոնման միջոցով թուրքական ամենամեծ թվային լրատվական պորտալ հանդիսացող «Habermetre» համակարգը պատրաստել է զեկույց այն մասին, թե որ քաղաքական առաջնորդների մասին է ամենաշատը խոսվել մամուլում 2019-ի ընթացքում։

Համակարգը մշակել է 7.732 թուրքական կայքի տվյալներ։

Թուրքիայի նախագահ Ռեջեփ Թայիփ Էրդողանը գլխավորում է ամենից շատ քննարկված քաղաքական կուսակցությունների առաջնորդների ցանկը։ Նա 1 մլն 669.786 անգամ հիշատակվել է մամուլում։

Երկրորդ տեղում «Ազգայնական շարժում» կուսակցության (MHP-ԱՇԿ) առաջնորդ Դևլեթ Բահչելին է։ Նրա անունը մամուլում հանդիպում է 232.650 անգամ։

Երրորդ տեղում ընդդիմադիր «Ժողովրդահանրապետական» կուսակցության (CHP-ԺՀԿ) առաջնորդ Քեմալ Քըլըչդարօղլուն է, ում մասին լրատվամիջոցներում հիշատակվել է 314.081 անգամ:

Նրան հաջորդում է մեկ այլ ընդդիմադիր գործիչ՝ «Լավ» (İyi) կուսակության նախագահ տկն Մերալ Աքշեները։

Հատկանշական է, որ առաջատարների ցուցակում բացակայում է Թուրքիայում ամենաբարձր վարկանիշն ունեցող գործիչներից «Ժողովրդահանրապետական» կուսակցության (CHP-ԺՀԿ) անդամ, Ստամբուլի քաղաքապետ Էքրեմ Իմամօղլուն։

Կարո Փայլանի ներկայացրած քրդամետ «Ժողովուրդների դեմոկրատական» կուսակցությունից (HDP-ԺԴԿ) ցուցակում տեղ են զբաղեցրել միայն կուսակցության համանախագահներ Փերվին Բուլդանն ու Սեզայի Թեմելլին։

Հայոց ցեղասպանության ժխտողականության կատաղի դեմքերից Դողու Փերինչեքը ևս մամուլում ամենաշատ հիշատակված քաղաքական գործիչների շարքում է։