Այսուհետ կարելի է Թուրքիայի քաղաքացիություն ստանալ նաև անշարժ գույք գնելու խոստման միջոցով

Հասարակական11:10, 07 Դեկտեմբեր 2018

Այսուհետ կարելի է Թուրքիայի քաղաքացիություն ստանալ նաև անշարժ գույք գնելու խոստման միջոցով

Թուրքիայի «Քաղաքացիության մասին» օրենքում ուշագրավ փոփոխություն է կատարվել։

Օրենքի վերանայված տարբերակը ուժի մեջ է մտել դեկտեմբերի 7-ին։ Համաձայն կատարված փոփոխության՝ այսուհետ այլ երկրների քաղաքացիները կարող են Թուրքիայի քաղաքացիություն ստանալ ոչ միայն երկրում փաստացի խոշոր ներդրում կատարելու, այլև նման «խոստում տալու» արդյունքում։

Դրա համար անհրաժեշտ է, որ օտար երկրի քաղաքացին նոտարով հաստատված պայմանագիր կնքի, որով կպարտավորվի կանխիկ գումարով 250․000 ԱՄՆ դոլար արժողությամբ անշարժ գույք ձեռք բերել Թուրքիայում։ Ընդ որում, այդ պարտավորվածության վերաբերյալ անշարժ գույքի կադաստրում պետք է կատարվի համապատասխան գրառում, իսկ կնքված պայմանագիրը հաջորդող երեք տարիների ընթացքում չի կարող փոխանցվել մեկ ուրիշին կամ չեղարկվել։

Նշենք, որ 2018թ․ սեպտեմբերին Թուրքիայի նախագահ Ռեջեփ Թայիփ Էրդողանի որոշմամբ նույն օրենքում նույնպես փոփոխություններ էին կատարվել։ Մասնավորապես, Թուրքիայի քաղաքացիություն ստանալու համար երկրում առնվազն 2 մլն դոլարի ներդրում կատարելու կամ առնվազն 1 մլն դոլար արժողությամբ անշարժ գույք ձեռք բերելու պայմանը փոխարինվել էր առնվազն 500․000 դոլարի ներդրում կատարելու կամ առնվազն 250․000 դոլար արժողությամբ անշարժ գույք ձեռք բերելու պայմանով։

Աղբյուր` Cumhuriyet