Թուրքիայի ԱԳՆ-ը դատապարտել է Հունաստանի Գերագույն դատարանի որոշումը

Տարածաշրջան12:08, 22 Օգոստոս 2018

Թուրքիայի ԱԳՆ-ը դատապարտել է Հունաստանի Գերագույն դատարանի որոշումը

Թուրք զինվորականներին քաղաքական ապաստան տալու վերաբերյալ Հունաստանի Գերագույն դատարանի որոշման առնչությամբ Թուրքիայում իշխող «Արդարություն և զարգացում» կուսակցության հայտարարությանը հետևեց երկրի ԱԳՆ-ի արձագանքը:

Թուրքիայի արտգործնախարարության տարածած պաշտոնական հաղորդագրության մեջ նշված է.

«Հունաստանի Գերագույն դատարանը հուլիսի 15-ի հեղաշրջման փորձի մեղավորներից Սուլեյման Օզքայնաքչըին ապաստան տալու վերաբերյալ Հունաստանի կառավարության առարկությունը մերժելով մի սկանդալային որոշման տակ դրեց իր ստորագրությունը:

Հունաստանի Գերագույն դատարանի այս որոշումը հակասում է ահաբեկչության դեմ պայքարում Հունաստանի ստանձնած միջազգային պարտավորություններին և խախտում է 1951թ. ընդունված Փախստականների կարգավիճակի վերաբերյալ Ժնևի կոնվենցիան»:

Թուրքիայի ԱԳՆ-ն այս որոշումը որակել է որպես թուրք ազգի արժանապատվությունը վիրավորող քայլ և կոչ արել հունական պետական կառույցներին թույլ չտալ դատական ատյաններին, որ երկիրը դարձնեն հեղաշրջման փորձի մասնակիցների համար ապահով հանգրվան:

Հիշեցնենք, որ ավելի վաղ Հունաստանի Պետական խորհուրդը, որը երկրում գործող 3 գերագույն դատարաններից մեկն է, մերժել էր կառավարության առարկությունը և որոշում ընդունել հուլիսի 15-ին Թուրքիայում հեղաշրջման փորձից հետո Հունաստան փախած զինվորականներին ապաստան տալու վերաբերյալ, ովքեր Թուրքիայում մեղադրվում են հեղաշրջման փորձին մասնակցելու և գյուլենական շարժմանը հարելու մեջ:

Այս ենթաբաժնի վերջին նորությունները

15:24, 04 հուլ

Էրդողան. «Կովկասը դառնալու է խաղաղության կենտրոն»

Այդ մասին հայտարարել է Թուրքիայի նախագահը Ադրբեջանի կողմից օկուպացված Ստեփանակերտում «Տնտեսական համագործակցության կազմակերպության» 17-րդ գագաթնաժողովի շրջանակներում։